SVÞ, VR og LÍV: Öryggi verslunarfólks á aðventunni

SVÞ, VR og LÍV: Öryggi verslunarfólks á aðventunni

SVÞ, VR og LÍV hvetja landsmenn til að versla fallega á aðventunni

SVÞ – Samtök verslunar og þjónustu, VR og Landssamband íslenskra verzlunarmanna (LÍV) beina sameiginlegri áskorun til landsmanna um að sýna starfsfólki verslana virðingu og tillitssemi í aðdraganda jóla. Samtökin vekja jafnframt athygli á mikilvægi þess að tryggja öryggi starfsfólks og sporna gegn áreitni, hótunum og ofbeldi í verslunum.

Aðventan er einn annasamasti tími ársins í íslenskri verslun. Starfsfólk verslana leggur sig fram um að veita góða þjónustu í miklu annríki og því er mikilvægt að samskipti viðskiptavina og starfsfólks einkennist af gagnkvæmri virðingu, kurteisi og tillitssemi.

Í sameiginlegri grein forsvarsfólks SVÞ, VR og LÍV er vakin athygli á þeim áskorunum sem starfsfólk verslana stendur frammi fyrir, meðal annars vegna áreitni, hótana og ofbeldis í starfi. Sérstakar áhyggjur eru af stöðu ungs starfsfólks, sem er fjölmennur hópur í verslun og þjónustu.

Sameiginleg áhersla á öryggi starfsfólks

SVÞ, VR og LÍV hafa tekið höndum saman um að efla öryggi starfsfólks í verslunum. Í júní 2025 undirrituðu samtökin minnisblað um samstarf sem miðar að því að sporna gegn ofbeldi, hótunum og áreitni á vinnustöðum.

Markmiðið er að stuðla að öruggara starfsumhverfi með aukinni vitundarvakningu, forvörnum og skýrum viðbrögðum við óviðeigandi hegðun.

Í sameiginlegri grein samtakanna er jafnframt lögð áhersla á ábyrgð fyrirtækja á að tryggja öruggt starfsumhverfi og mikilvægi þess að stjórnvöld styðji við aukna vernd starfsfólks.

Virðing og tillitssemi í jólaversluninni

Þótt langflest samskipti í verslunum gangi vel geta komið upp erfiðar aðstæður, sérstaklega þegar mikið er að gera. Mikilvægt er að minna á að starfsfólk verslana á rétt á að sinna störfum sínum án þess að verða fyrir áreitni, hótunum eða ofbeldi.

Með sameiginlegri áskorun vilja SVÞ, VR og LÍV hvetja viðskiptavini til að sýna þolinmæði og skilning í annríki aðventunnar.

Góð samskipti eru allra hagur og með gagnkvæmri virðingu stuðlum við að öruggara og ánægjulegra umhverfi fyrir bæði starfsfólk og viðskiptavini.

Verslum fallega á aðventunni. Sýnum starfsfólki verslana virðingu, kurteisi og tillitssemi.

Lesa sameiginlega grein forsvarsfólks SVÞ, VR og LÍV á vef LÍV

Yfir 4.000 klukkustundir í símenntun í fyrsta októberátaki Ræktum vitið

Yfir 4.000 klukkustundir í símenntun í fyrsta októberátaki Ræktum vitið

Yfir 4.000 klukkustundir í símenntun í fyrsta októberátaki Ræktum vitið

Alls skráðu 270 þátttakendur rúmlega 4.000 klukkustundir í sí- og endurmenntun í október þegar fyrsta átaksverkefnið undir merkjum Ræktum vitið fór fram. Þátttakendur skráðu samtals 2.842 lærdómsverkefni og sýndu þannig að tækifærin til að efla þekkingu og hæfni í starfi eru fjölbreytt. ELKO, Danól og Rue de Net hlutu viðurkenningar fyrir árangur sinn í átakinu.

Ræktum vitið er samstarfsverkefni Samtaka verslunar og þjónustu (SVÞ), VR og Landssambands íslenskra verzlunarmanna (LÍV) sem hefur það að markmiði að efla sí- og endurmenntun starfsfólks í verslun og þjónustu og hvetja fyrirtæki til að gera þekkingaröflun að eðlilegum hluta vinnustaðamenningarinnar. (Sjá samstarfssamning) 

Í október var í fyrsta sinn efnt til sérstaks mánaðarátaks þar sem starfsfólk og fyrirtæki voru hvött til að skrá alla starfstengda þekkingaröflun á vefnum raektumvitid.is. Jafnframt var efnt til vinveittrar keppni milli fyrirtækja í þremur stærðarflokkum.

Tveir vinnudagar af lærdómi á hvern þátttakanda

Þátttakan fór vel af stað og alls stofnuðu 402 einstaklingar aðgang að átaksvefnum. Þar af skráðu 270 einstaklingar að minnsta kosti eitt lærdómsverkefni í október.

Samtals voru skráðar 4.077 klukkustundir í sí- og endurmenntun, sem jafngildir um 15 klukkustundum á hvern virkan þátttakanda, eða tæplega tveimur átta klukkustunda vinnudögum.

Helstu niðurstöður októberátaksins:

  • 270 virkir þátttakendur

  • 26 virkir vinnustaðir

  • 2.842 skráð lærdómsverkefni

  • 4.077 klukkustundir í sí- og endurmenntun

  • 10,5 skráningar að meðaltali á hvern virkan þátttakanda

Þátttakan var góð út mánuðinn og tók sérstaklega við sér á lokasprettinum. Flestar skráningar á einum degi voru 179 talsins þann 28. október.

Símenntun er miklu meira en námskeið

Eitt af meginmarkmiðum átaksins var að vekja athygli á því að sí- og endurmenntun getur tekið á sig margar myndir. Hún einskorðast ekki við hefðbundin námskeið eða formlegt nám heldur getur falist í fjölbreyttri þekkingaröflun sem tengist daglegum störfum.

Niðurstöðurnar endurspegla þetta vel. Hlustun á fræðsluefni var vinsælasta leiðin til þekkingaröflunar en einnig var mikið um að þátttakendur horfðu á fræðsluefni, læsu greinar og annað námsefni eða lærðu á nýja tækni.

Athygli vekur að 249 skráningar tengdust því að læra á gervigreind, sem endurspeglar áhuga þátttakenda á að tileinka sér nýja tækni og færni.

Þátttakendur skráðu einnig fjölmörg verkefni sem snerust um að miðla þekkingu og hugmyndum til samstarfsfólks.

Um 85% skráninga voru á virkum dögum, sem bendir til þess að þekkingaröflun hafi að verulegu leyti verið samþætt daglegum störfum.

ELKO, Danól og Rue de Net sigurvegarar

Til að hvetja til þátttöku var efnt til keppni milli vinnustaða þar sem fyrirtækjum var skipt í þrjá stærðarflokka.

Viðurkenningar fyrir besta árangurinn í októberátakinu 2026 hlutu:

🏆 Lítil fyrirtæki: Rue de Net

🏆 Meðalstór fyrirtæki: Danól

🏆 Stór fyrirtæki: ELKO

Viðurkenningarnar voru afhentar við athöfn í Húsi atvinnulífsins föstudaginn 6. nóvember af Benedikt S. Benediktssyni, framkvæmdastjóra SVÞ, og Stefáni Sveinbjörnssyni, framkvæmdastjóra VR.

Sérstaka athygli vekur árangur ELKO, en starfsfólk fyrirtækisins skráði um 61% allra lærdómsverkefna í átakinu. Það sýnir vel hversu miklum árangri samstillt átak innan vinnustaðar getur skilað.

Góður árangur en aðeins byrjunin.

„Við erum mjög ánægð með að þátttakendur hafi skráð yfir 4.000 klukkustundir í sí- og endurmenntun í þessu fyrsta októberátaki. Það er góður árangur og sýnir okkur að hugmyndin á fullt erindi við atvinnulífið. En við vitum líka að tækifærin eru miklu fleiri. Okkar von er að átakið vaxi og dafni á komandi árum, að enn fleiri fyrirtæki og starfsmenn taki þátt og að símenntun verði sífellt eðlilegri hluti af daglegu starfi. Við erum rétt að byrja,“ segir Benedikt S. Benediktsson, framkvæmdastjóri SVÞ.

Þótt októberátakinu sé lokið heldur samstarfsverkefnið Ræktum vitið áfram. Markmiðið er að stuðla að aukinni vitund um mikilvægi sí- og endurmenntunar og hvetja bæði starfsfólk og stjórnendur til að leggja rækt við þekkingu og hæfni í síbreytilegu starfsumhverfi.

Við þökkum öllum fyrirtækjum og þátttakendum fyrir þátttökuna og óska sigurvegurunum þremur innilega til hamingju með árangurinn.

Hvert skref í sí- og endurmenntun telur.

Nánari upplýsingar um verkefnið má finna á raektumvitid.is.

_______________________________________________

Breytingar á stjórn og starfsmannahópi SVÞ

Breytingar á stjórn og starfsmannahópi SVÞ

FRÉTTATILKYNNING
Breytingar á stjórn og starfsmannahópi SVÞ

Jónas Kári Eiríksson hefur kjörinn varaformaður stjórnar SVÞ – Samtaka verslunar og þjónustu og tekið við stjórnarformennsku í Vinnudeilusjóði. Elín Tinna Logadóttir hefur tekið sæti í stjórn SVÞ.  Örn Arnarson hefur verið ráðinn verkefna- og tengslastjóri samtakanna.

Elín Tinna Logadóttir, framkvæmdastjóri 66°Norður á Íslandi, hefur tekið sæti í stjórn SVÞ í stað Eddu Rutar Björnsdóttur. Elín Tinna hefur fjölbreytta reynslu af verslunarrekstri. Hún starfaði hjá 66°Norður í fimmtán ár áður en hún tók við sem framkvæmdastjóri Útilífs. Í september 2025 sneri hún aftur til 66°Norður sem framkvæmdastjóri á Íslandi.

Jónas Kári Eiríksson, framkvæmdastjóri vörustýringar hjá Inchcape á Íslandi, hefur verið kjörinn varaformaður stjórnar SVÞ og tekið við stjórnarformennsku í Vinnudeilusjóði. Jónas Kári hefur setið í stjórn SVÞ frá 2025, átt sæti í stjórn Bílgreinasambandsins um nokkurra ára skeið og kemur að starfi samtakanna með reynslu á sviði verslunar og þjónustu.

Örn Arnarson hefur verið ráðinn verkefna- og tengslastjóri SVÞ og hefur störf hinn 1. október næstkomandi. Örn hefur starfað sem blaðamaður og ritstjórnarfulltrúi á Viðskiptablaðinu, hefur þar fengist við umfjöllun um íslenskt viðskipta- og atvinnulíf, og verið tíður gestur í hlaðvarpsþáttum. Örn hefur áður starfað á sviði hagsmunagæslu sem starfsmaður Samtaka fjármálafyrirtækja.

SVÞ þakka Eddu Rut kærlega fyrir mikilvægt framlag hennar til starfs samtakanna, bjóða Elínu Tinnu og Örn velkomin til starfa fyrir samtökin og óska Jónasi Kára alls hins besta í nýjum hlutverkum.

FRÉTTATILKYNNING – Breytingar í stjórn og starfsmannahópi SVÞ

 

Fréttatilkynning | SVÞ skorar á Alþingi að uppfæra rammann um áfengissölu

Fréttatilkynning | SVÞ skorar á Alþingi að uppfæra rammann um áfengissölu

SVÞ – Samtök verslunar og þjónustu og sjálfstæðar sérvöruverslanir með áfengi hafa sent alþingismönnum áskorun um að setja skýran lagaramma utan um vefverslun með áfengi. Neytendur hafa þegar valið aukið valfrelsi en löggjöfin hefur ekki fylgt þróun markaðarins. 

Nýleg könnun Gallup sýnir að um þriðji hver Íslendingur hefur keypt áfengi í vefverslun. Hlutfallið nálgast 60% meðal fólks á aldrinum 20–39 ára. Varanleg breyting hefur því orðið á kauphegðun almennings og vefverslun með áfengi er þegar orðin hluti af íslenskum veruleika. 

SVÞ og sérvöruverslanirnar telja brýnt að Alþingi viðurkenni þessa stöðu og setji skýrar og samræmdar reglur um starfsemina. Reglurnar þurfi meðal annars að taka til leyfisveitinga, opnunartíma, staðsetningar og aðgengi, upplýsingagjafar, aldurseftirlits og afhendingar.

Markmiðið sé að tryggja ábyrga starfsemi, virkt eftirlit og jafnræði milli allra söluaðila. Sömu kröfur þurfi að gilda um íslensk og erlend fyrirtæki sem selja áfengi til íslenskra neytenda. 

„Neytendur hafa þegar valið. Þriðji hver landsmaður hefur keypt áfengi í vefverslun og hlutfallið er enn hærra meðal yngra fólks. Löggjöfin er hins vegar barn síns tíma og tekur ekki mið af þeim markaði sem hefur orðið til með breyttri kauphegðun og auknum hraða og aukinni skilvirkni í flutningum á þeim tíma sem liðinn er frá því að Ísland gerðist aðili að að EES-samningnum,“ segir Benedikt S. Benediktsson, framkvæmdastjóri SVÞ. 

Ábyrgir rekstraraðilar hafa innleitt aldurseftirlit við kaup og afhendingu. Skýran lagaramma skortir hins vegar til að tryggja að sömu kröfur gildi um alla sem selja áfengi til íslenskra neytenda og að stjórnvöld hafi fullnægjandi úrræði til eftirlits. 

„Það er breið samstaða um að vernda börn og ungmenni og vinna gegn skaðlegri áfengisneyslu. Skýrar reglur og skilvirkt eftirlit eru forsenda þess að þau markmið náist. Um smátt skref er að ræða og því getur ÁTVR áfram gegnt sínu hlutverki samhliða því að Alþingi setji vefverslun skýran og nútímalegan ramma,“ segir Benedikt. 

SVÞ og sérvöruverslanir með áfengi hafa jafnframt hrundið af stað upplýsingaherferð undir yfirskriftinni „Þriðji hver verslar hér“. Markmið hennar er að vekja athygli á breyttri kauphegðun og þeirri staðreynd að stór hluti þjóðarinnar nýtir nú þegar aukið val við áfengiskaup. 

Nánari upplýsingar um stöðu vefverslunar með áfengi, þróun markaðarins og helstu rök fyrir skýrari lagaramma má finna á Valfrelsi.is. 

Smelltu -> SVÞ Fréttatilkynning Skorað á Alþingi að uppfæra rammann um áfengissölu til að hlaða niður fréttatilkynningunni.

Greiningaraðila greinir á um álagningu eldsneytis

Greiningaraðila greinir á um álagningu eldsneytis

Greiningaraðilar verkalýðshreyfingarinnar ósammála um álagningu eldsneytis

Á skömmum tíma hafa tvær greiningar á eldsneytisverði verið birtar af hálfu aðila innan verkalýðshreyfingarinnar. Það sem vekur ekki síst athygli er að umræddar greiningar komast að ólíkum niðurstöðum. Í sjálfu sér er ekki óeðlilegt að aðilar séu ósammála um túlkun gagna, en það vekur upp alvarlegar spurningar um forsendur og vinnubrögð þegar ASÍ kemst að þeirri niðurstöðu að framlegð á eldsneyti það sem af er ári sé nálægt sögulegu meðaltali, á meðan Viska kemst að þeirri niðurstöðu á hún sé sögulega há. Þá greinir aðila einnig á um umfang framlegðarinnar sjálfrar svo um munar, eða um 17 krónum á lítrann fyrir árið 2026.

Í kjölfar greiningar Visku bentu SVÞ á mikilvægi þess að notast við mælikvarða sem endurspegla raunverulegan innkaupakostnað og raunverulegt verð til neytenda hér á landi. Bent var á að sú aðferðafræði sem stuðst var við í greiningu Visku væri til þess fallin að ofmeta álagningu. ASÍ virðist einnig komast að áþekkri niðurstöðu, þ.e. að Viska hafi ofmetið álagningu á eldsneyti.

Auðvelt að ofmeta álagningu ef mælikvarðar eru rangir

Greining ASÍ og Visku á það þó sammerkt að stuðst er við heimsmarkaðsverð í Bandaríkjunum fremur en í Evrópu og horfa alfarið fram hjá flutningskostnaði og örum breytilegum kostnaði sem fellur til við innkaup. Þetta þarf að leiðrétta, því þetta leiðir til þess að báðar greiningarnar vanmeta raunverulegan innkaupakostnað. Munurinn er þó sá að ASÍ styðst við lægsta verð á dælu hverju sinni, ólíkt Visku sem styðst við meðalverð. Ætla má að lægsta verð gefi raunhæfari mynd af því verði sem neytendur greiða í reynd, þar sem neytendum stendur almennt til boða ýmis afsláttarkjör í gegnum vildarkerfi eða með notkun dælulykils. Því má leiða að því líkum að niðurstaða ASÍ sé nær raunveruleikanum þótt aðferðafræðin geti eftir sem áður leitt til ofmats á álagningu sökum þess að innkaupaverð er vanmetið. SVÞ hefur áður bent á að eðlilegra sé að horfa til þróunar innflutningsverðs á eldsneyti samkvæmt tollagögnum Hagstofu Íslands.

Aðferðafræðin skiptir máli. Hún skiptir máli við mat á framlegð í dag, og hún skiptir máli þegar valið er tímabil til samanburðar. Í greiningu ASÍ kemur fram að framlegð hafi aukist frá árinu 2022. Mikilvægt er að hafa í huga að árin 2020 til 2022 voru óvenjuleg fyrir margar sakir, ekki síst Covid og afleiðingar þess. Samanburður við sögulegt frávik getur verið villandi, nema leiðrétt sé fyrir því, enda benda eigin gögn ASÍ til þess að framlegð hafi verið óvenju lág á þessum árum. Að sama skapi virðast gögnin benda til þess að nú sé markaðurinn að færast nær sögulegu horfi.

Afnám bensíngjalda skilaði sér í lækkun bensínverðs um áramót

Að gefnu tilefni, má einnig leiðrétta staðhæfingar um þær breytingar á eldsneytisverði sem tóku gildi um áramót og ályktanir um að lækkun hafi ekki skilað sér til neytenda í lægra dæluverði. Í ljósi þess að umræða um þessar breytingar hefur skotið upp kollinum á ný, virðist sem nauðsynlegt sé að árétta að dæmin benda til þess að lækkunin hafi skilað sér til neytenda. Er þessi ályktun m.a. reist á samantekt ASÍ á bensínverði fyrir og eftir áramót, sem sýnir að hjá öllum smásöluaðilum lækkaði lægsta verð um 96,2–96,6 kr. á lítra. Miðað við forsendur SVÞ þar sem gengið er út frá 10% íblöndun, er það um 1,8–2,2 kr. meiri lækkun en útreikningar SVÞ gáfu tilefni til. Þá benda gögn Hagstofu Íslands jafnframt til þess að áhrif kerfisbreytingarinnar á vísitölu neysluverðs um áramótin hafi verið 0,09% til lækkunar en ekki 0-0,1% til hækkunar líkt gert var ráð fyrir í forsendum frumvarps um kílómetragjald. Þetta hefur SVÞ áður bent á.

Ábyrgð greiningaraðila er mikil og forsendur verða að standast skoðun

Vegna ástandsins í Miðausturlöndum er eldsneytisverð mikið til umfjöllunar í fjölmiðlum bæði hér heima sem og erlendis. Dragi ekki til tíðinda, má ætla að slík umfjöllun verði áfram í deiglunni á næstunni. Reynir þá á að greiningaraðilar vandi til verka og umræðan fari fram á forsendum sem standast skoðun. Ef greiningar byggja ekki á mælikvörðum sem endurspegla raunverulegan kostnað og raunverulegt verð til neytenda er hætt við að þær valdi upplýsingaóreiðu í stað upplýstrar og málefnalegrar umræðu. Almenningur á rétt á því að umræða um jafn mikilvægan útgjaldalið sé rétt, skýr og reist á traustum grunni.

____

Sjá umfjöllun VB.is HÉR! 

Ný stjórn SVÞ 2026 – 2027

Ný stjórn SVÞ 2026 – 2027

Ný stjórn SVÞ kjörin á aðalfundi samtakanna 2026

Aðalfundur SVÞ – Samtaka verslunar og þjónustu var haldinn í morgun, fimmtudaginn 12. mars, á Parliament Hótel í Reykjavík .

Á fundinum var kosið um þrjú sæti meðstjórnenda.
Alls bárust átta framboð til meðstjórnenda.

Réttkjörin í stjórn SVÞ til tveggja starfsára eru eftirtalin:

Stjórn er þannig skipuð starfsárið 2026-2027:

Auður Daníelsdóttir, forstjóri Orkunnar, formaður SVÞ
Dagbjört Erla Einarsdóttir, meðstjórnandi, framkvæmdastjóri innri rekstrar og yfirlögfræðingur Heima
Jónas Kári Eiríksson, meðstjórnandi, framkvæmdastjóri vörustýringar Öskju bifreiðaumboðs
Kristín Lára Helgadóttir, meðstjórnandi, yfirlögfræðingur Veritas
Edda Rut Björnsdóttir, meðstjórnandi, framkvæmdastjóri innanlandssviðs Eimskipafélags Íslands
Magnús Magnússon, framkvæmdastjóri smásölu -og markaðssviðs Húsasmiðjunnar
Inga Rut Jónsdóttir, framkvæmdastjóri Kringlunnar

Nánari upplýsingar veitir:

Benedikt S. Benediktsson, framkvæmdastjóri SVÞ benedikt@svth.is

___________

SMELLIÐ HÉR TIL AÐ NÁLGAST ÁRSSKÝRSLU STJÓRNAR SVÞ 2025-2026

SMELLIÐ HÉR FYRIR ÚRSLIT STJÓRNARKOSNINGA 2026

SMELLIÐ HÉR FYRIR FULLTRÚARÁÐ SA 2026-2027