20/04/2026 | Fréttir, Samtök sjálfstæðra skóla
Ný stjórn og aukin breidd á aðalfundi Sjálfstæðra skóla
Aðalfundur Sjálfstæðra skóla (SSK) var haldinn 16. apríl síðastliðinn. Fundurinn var vel sóttur og dagskráin fjölbreytt og áhugaverð.
Alma Guðmundsdóttir, formaður stjórnar, fór yfir helstu verkefni og starfsemi liðins árs. Þá voru lagðar fram og samþykktar breytingar á samþykktum samtakanna.
Einnig urðu breytingar á stjórn. Kristrún Birgisdóttir lét af störfum sem varaformaður og í hennar stað var kjörin Sigríður Dröfn Ámundadóttir. Þá dró Sigríður Stephensen sig úr stjórn eftir farsælt og langt starf og tekur Kristján Ómar Björnsson sæti hennar. Ólafur Þór Kristjánsson er nýr varamaður í stjórn.
Samtökin þakka Kristrúnu og Sigríði Stephensen innilega fyrir þeirra ómetanlega framlag til starfs SSK og bjóða nýja stjórnarmenn hjartanlega velkomna til starfa.
Á fundinum kynntu nýir félagsmenn sig, Aðalþing og Hamingjuhöllin og var mjög áhugavert að hlusta á kynningar þeirra. Samtökin bjóða þau hjartanlega velkomin í hópinn. Þá flutti Bergur Ebbi áhugaverðan fyrirlestur sem vakti lukku.
Fundinum lauk með léttum veitingum, búbblum og góðum samræðum.
________
21/01/2026 | Samtök sjálfstæðra skóla, Viðburðir
Aðalfundur SSK 2026 | Samtök sjálfstæðra skóla
Verður haldinn fimmtudaginn 16. apríl 2026
Tími: 15:00 – 17:00
Staður: Hús verslunarinnar, fundarherbergi Hylur 1.hæð
Nánari dagskrá og skráning mun birtast HÉR!
21/11/2025 | Innra starf, Samtök sjálfstæðra skóla
Leikskólinn Vinagarður – 50 ára
Sjálfstæðir skólar óska Leikskólanum Vinagarði innilega til hamingju með 50 ára afmælið.
Vinagarður hefur frá 1975 verið einstakur hluti uppeldis- og menntasamfélags í Reykjavík. Skólinn á rætur í starfi KFUM og KFUK og byggir á kristnum gildum, vináttu og tengingu við náttúruna. Þessar áherslur hafa skapað traust, hlýtt og fræðandi umhverfi þar sem börn fá að kanna, læra og njóta í nálægð við lífríki Laugardalsins.
Á afmælisdaginn var nýtt merki skólans afhjúpað, hannað af foreldri og grafískum hönnuði. Merkið sameinar tákn vináttu, náttúru og kristinnar trúar og endurspeglar gildi Vinagarðs á fallegan og einfaldan hátt.
Sjálfstæðir skólar fagna tímamótunum og óska Vinagarði áframhaldandi gæfu í starfi með börnum og fjölskyldum í Reykjavík.
Til hamingju með afmælið
Á myndinni sést Heiða Björg Hilmarsdóttir, borgarstjóri Reykjavíkur, afhjúpa nýtt merki Vinagarðs
04/04/2025 | Fréttir, Innra starf, Samtök sjálfstæðra skóla
Aðalfundur Sjálfstæðra skóla fór fram 3. apríl síðastliðinn. Að fundi loknum héldu samtökin upp á tímamót – 20 ár liðin frá stofnun samtakanna. Í tilefni dagsins var litið um öxl og farið yfir vegferðina fram að deginum í dag.
Margrét Pála Ólafsdóttir, Margrét Theódórsdóttir og Lovísa Hallgrímsdóttir, sem skipuðu fyrstu stjórn Sjálfstæðra skóla, rifjuðu upp upphafsárin og sögðu frá þeirri hugsjón og eldmóði sem lagði grunn að starfi samtakanna.
Villi Naglbítur lét gleðina ráða för með söng og gamanmálum sem vöktu hlátur og góðar undirtektir. Þá heilsaði Steinn Jóhannsson, nýr sviðsstjóri Skóla- og frístundasviðs Reykjavíkurborgar, gestum og færði samtökunum velfarnaðaróskir.
Að lokinni dagskrá nutu félagsmenn samverunnar yfir góðum veitingum, veigum og ánægjulegum samræðum.
19/03/2025 | Innra starf, Samtök sjálfstæðra skóla
Sjálfstæðir skólar óska Tjarnarskóla innilega til hamingju með 40 ára afmælið!
Tjarnarskóli hefur í fjóra áratugi verið einstakur vettvangur þar sem nemendur fá að blómstra í hlýlegu og hvetjandi umhverfi. Frá stofnun skólans árið 1985 hafa Margrét Theodórsdóttir, María Solveig Héðinsdóttir og allt starfsfólk lagt metnað sinn í að skapa skólasamfélag þar sem hver og einn nemandi fær stuðning við að vaxa og dafna, bæði í námi og persónulegum þroska.
Einkunnarorð skólans, „Allir eru einstakir“ og „Lítill skóli með stórt hjarta“, endurspegla þann kærleika, virðingu og fagmennsku sem einkenna starf skólans. Áhersla á einstaklingsmiðað nám, vellíðan og uppbyggjandi samskipti hefur gert Tjarnarskóla að mikilvægu og dýrmætu samfélagi fyrir fjölda nemenda í gegnum tíðina.
Við hjá Sjálfstæðum skólum viljum nota þetta tækifæri til að þakka Tjarnarskóla fyrir ómetanlegan stuðning og framlag til skólasamfélagsins í gegnum árin.
Við óskum Tjarnarskóla, kennurum, starfsfólki, nemendum og foreldrum hjartanlega til hamingju með tímamótin og óskum þeim velfarnaðar á komandi árum.
Til hamingju með afmælið!
Sjálfstæðir skólar
______
Mynd: Frá vinstri, Lovísa Hallgrímsdóttir stofnandi Regnbogans,Margrét Theodórsdóttir stofnandi og framkvæmdastjóri Tjarnarskóla og Sigríður Anna Guðjónsdóttir skólastjóri Ísaksskóla
25/11/2024 | Fréttir, Kosningar 2024, Samtök sjálfstæðra skóla
Vb.is birtir þann 25. nóvember 2024:
Kosningaþáttur SVÞ: Guðmundur Ari og Bóas.
Í þættinum er m.a. rætt um einkarekstur í skólakerfinu og gagnrýni Viðskiptaráðs á menntakerfið.
Guðmundur Ari Sigurjónsson, sem skipar annað sætið á lista Samfylkingarinnar í Suðvesturkjördæmi, og Bóas Hallgrímsson, framkvæmdastjóri fræðslu og fagstarfs hjá Hjallastefnunni, ræða menntmál í nýjum samtalsþætti Samtaka verslunar- og þjónustu fyrir þingkosningarnar.
Horfa má á þáttinn í heild sinni á vb.is hér: vb.is/frettir/kosningathattur-svth-gudmundur-ari-og-boas
Viltu vita meira um þættina þar sem rædd eru fjölbreytt mál sem félagsfólk varðar, s.s matvöru og matvöruverslanir, samgöngur og ökutæki, einkarekstur í heilbrigðisþjónustunni o.fl. Þú getur fengið allar upplýsingar um þá hér: svth.is/kosningar-2024
Síða 1 af 712345...»Síðasta »
