Horfðu á upptökuna! Uppfærum Ísland – stafræn umbreyting eða dauði

Horfðu á upptökuna! Uppfærum Ísland – stafræn umbreyting eða dauði

Í tilefni af aðalfundi SVÞ var frumsýndur þátturinn Uppfærum Ísland – stafræn umbreyting eða dauði, fimmtudaginn 18. mars kl. 10:00.


Stafræn þróun, ásamt þróun til aukinnar sjálfbærni, er stærsta umbreytingaverkefni sem íslenskt atvinnulíf og vinnumarkaður standa frammi fyrir. Nauðsynlegt er að íslenskt samfélag í heild taki sig saman til að styðja þá umbreytingu, þar sem samkeppnishæfni þjóðarinnar og lífsgæði okkar allra eru undir. Í þættinum var fjallað um áhrif stafrænnar umbreytingar, þau tækifæri og áskoranir sem í henni felast, stöðu íslensks atvinnulífs á því sviði og það verkefni sem við eigum fyrir höndum að uppfæra Ísland.

Rætt var við Katrínu Jakobsdóttur, forsætisráðherra, og Þórdísi Kolbrúnu Reykfjörð Gylfadóttur, ráðherra ferðamála, iðnaðar og nýsköpunar um áhrif stafrænnar umbreytingar fyrir íslenskt atvinnulíf, vinnumarkað og samfélag, hlutverk stjórnvalda í stuðningi við atvinnulífið á þessari vegferð og hvað íslensk stjórnvöld hyggjast gera á því sviði. Einnig var rætt við Jón Ólaf Halldórsson, formann SVÞ og forstjóra Olís um stöðu íslensks atvinnulífs í stafrænni umbreytingu og nauðsynlegar aðgerðir.

Frændfólk okkar á Norðurlöndunum eru undantekningarlaust í topp 10 sætunum í alþjóðlegum samanburði þegar kemur að stafrænni umbreytingu. Í þættinum skyggndumst við inn í hvernig hlutirnir eru gerðir þar og ræddum við fulltrúa Danmerkur, Finnlands, Noregs og Svíþjóðar um mikilvægi stuðnings stjórnvalda við atvinnulífið, hvað verið er að gera í viðkomandi landi o.fl.

Viðmælendur okkar frá Norðurlöndunum  voru:

Hanna Marttinen-Deakins, Senior Director, Digitalisation, Business Finland

Jan Damsgaard, Professor við stafrænu deildina í Copenhagen Business School, fulltrúi í danska Disruption ráðinu á vegum stjórnvalda og stjórnarmaður í SMV:Digital

Lena Carlsson, Deputy Director General, Regeringskansliet, Infrastrukturdepartmentet (innviðaráðuneytið), Digital Society Division í Svíþjóð. Lena fer fyrir stafrænum stefnumálum sænsku ríkisstjórnarinnar.

Paul Chaffey, Statssekretær, Kommunal- og moderniseringsdepartmentet, helsti ráðgjafi ráðherra stafrænna mála í Noregi


Fagnám fyrir starfandi verslunarfólk

Fagnám fyrir starfandi verslunarfólk

Hefur þú kynnt þér fagnám verslunar- og þjónustu við Verzlunarskóla Íslands fyrir þitt starfsfólk?

Námið er 90 einingar og er blanda af fjarnámi og vinnustaðanámi í fyrirtækjunum. Umsækjendum stendur til boða að fara í raunfærnimat hjá Mími þar sem kunnátta og hæfni hvers og eins er metin til eininga á móti kenndum áföngum. Þannig fá einstaklingar með starfsreynslu og hæfni slíkt metið til eininga og styttingar á námi sínu. Markmið námsins, er meðal annars að nemendur auki þekkingu sína og færni á vinnustað, þjálfist í að veita viðskiptavinum framúrskarandi þjónustu og geti stýrt verkefnum í verslun í samræmi við skipulag og áætlanir.

 

Smelltu hér til að fá frekari upplýsingar

Fyrstu nemar brautskráðir úr fagnámi verslunar og þjónustu við Versló

Fyrstu nemar brautskráðir úr fagnámi verslunar og þjónustu við Versló

Fyrstu nemendur brautskráðust úr fagnámi verslunar og þjónustu í Verzlunarskóla Íslands nú fyrir jólin. Í umfjöllun í Morgunblaðinu og á Mbl.is lýstu nemarnir mikilli ánægju með námið.

Námið er 90 einingar og fer fram í lotum. Það hófst í janúar í fyrra fyrir tilstilli SVÞ og VR sem leituðu til Versló og í kjölfarið var myndaður þróunarhópur. Um 20 nemendur eru nú í náminu.

Sjá umfjöllun hér á Mbl.is

Sjá umfjöllun hér á baksíðu Morgunblaðsins (aðgengilegt fyrir áskrifendur)

Úrelt menntun eða framtíðarsýn?

Úrelt menntun eða framtíðarsýn?

Sara Dögg Svanhildardóttir, forstöðumaður mennta- og fræðslumála Samtaka verslunar og þjónustu skrifar í Fréttablaðið þann 3. mars sl.

Þær eru fjölmargar áskoranirnar sem við stöndum frammi fyrir þegar kemur að því að leggja fram menntastefnu heillar þjóðar. Ein þeirra er stafræna umbyltingin sem á sér stað út um allan heim. Við lifum á tímum þar sem umbreytingum vegna stafrænnar tækni fleygir fram á ógnarhraða. Við komumst ekki hjá að mæta þeim umbreytingum og taka þátt í þeim, enda umlykur stafræn þróun nú þegar allt samfélag okkar, hvort sem er í leik eða starfi.

Til þess að vera fær um að athafna okkur í nýju umhverfi gegnir menntun á þessu sviði mjög mikilvægu hlutverki. Hvers kyns menntun sem eykur færni í umhverfi stafrænnar tækni gerir okkur hæfari til að takast á við breytt umhverfi.

Nýverið kynnti menntamálaráðherra nýja tíma í starfs- og tækninámi í samvinnu við Samtök íslenskra sveitarfélaga og Samtök iðnaðarins. Afar brýnt og löngu tímabært er að blása til sóknar á þessu sviði. Menntun í stafrænu tæknilæsi á leik- og grunnskólastigi er gríðarlega mikilvægur grunnur fyrir alla tæknimenntun, en ekki síður menntun almennt. Störf munu umbreytast hröðum skrefum og krafan vaxa ört um menntað starfsfólk í stafrænni tækni til að halda uppi samkeppnishæfni íslensks atvinnulífs.

Til framtíðar litið er óábyrgt að gera ráð fyrir öðru en að nemendur nútímans muni starfa í stafrænu umhverfi og þá er nánast sama hvar stigið er niður fæti í starfsvali. Þess vegna er gríðarlega mikilvægt að námsumhverfi dagsins í dag byggi á þeim veruleika. Menntastefna til framtíðar þarf að taka mið af því.

 

Samkaup hlutu Menntasprota atvinnulífsins

Samkaup hlutu Menntasprota atvinnulífsins

Samkaup hf. hlutu Menntasprota atvinnulífsins 2020 en verðlaunin voru veitt í Hörpu í gær, 5. febrúar, í tilefni af Menntadegi atvinnulífins. Þetta er í sjöunda sinn sem verðlaunin eru veitt.

SVÞ óskar þessu öfluga félagsfólki okkar til hamingju með þessa glæsilegu viðurkenningu á öflugu fræðslu- og menntastarfi!

„Þau hafa sett sér metnaðarfulla fræðslustefnu og þetta hefur sannarlega skilað miklum árangri og þess vegna hljóta þau þessi verðlaun,“ sagði Lilja Dögg Alfreðsdóttir, mennta- og menningarmálaráðherra eftir að hafa afhent fulltrúum Samkaupa verðalaunin. „Þið eruð vel að þessu komin,“ skaut Guðni Th. Jóhannesson, forseti Íslands inn í.

Í rökstuðningi dómnefndar kemur fram að Samkaup sé til fyrirmyndar og að stjórnendur fyrirtækisins hafi tekið markvissa ákvörðun um nýtt upphaf í fræðslu- og þekkingarmálum innan fyrirtækisins. Dómnefnd trúir því einnig að skuldbinding fyrirtækisins í þessum efnum sé komin til að vera. Samkaup hefur sett fram skýr markmið með átaki sínu og sérstök áhersla lögð á hæfni og færni starfsfólks á öllum sviðum reksturins samkvæmt dómnefndinni. Jákvætt viðhorf stjórnenda, mikil starfsánægja, gott almennt viðhorf og möguleikar fyrir nýtt starfsfólk og viðskiptavini félagsins er einnig hrósað. Sérstakur vettvangur símenntunar meðal starfsfólks Samkaupa, sem fékk nafnið „Fræðsluskot Kaupmannsins“ er einnig mikið hampað af dómnefndinni. Tilgangurinn með verkefninu er að dýpka þekkingu starfsfólks Samkaupa. Fræðsluskot Kaupmannsins eru stutt og hnitmiðuð í eðli sínu og kennd á mismunandi vegu til þess að geta aðlagast þörfum og óskum bæði fyrirtækisins og starfsfólks hverju sinni.

„Samkaup leggur ríka áherslu á að styðja starfsfólk sitt til áframhaldandi starfsþróunar og er eitt af megin markmiðum fyrirtækisins að starfmenn Samkaupa fái tækifæri til að stunda nám samhliða vinnu sem opnar tækifæri til frekari starfsþróunar innan fyrirtækisins og utan þess,“ segir Gunnur Líf Gunnardóttir, mannauðsstjóri Samkaupa. „Við hjá Samkaupum erum mjög stolt af þessum verðlaunum enda höfum við lagt mikla vinnu í skipulagða og markvissa fræðslu innan fyrirtækisins. Samkaup reka 60 verslanir víðs vegar um landið og það starfa tæplega 1.300 manns hjá okkur í 660 stöðugildum. Það er því mikið verk að stuðla að þekkingaröflun fyrir allt þetta fólk og að fá verðlaun fyrir vel unnin störf skiptir okkur miklu máli.“

Haldið er vel utan um starfsfólk sem sækir sér fræðslu og menntun, um leið og starfsfólk er hvatt til að auka við þekkingu sína. Þá hefur Samkaup verið leiðandi í þróun og mótun á Fagnámi fyrir verslun og þjónustu, ásamt því að fara nýjar leiðir í eflingu fræðslu innan fyrirtækisins.

„Þó við höfum fengið verðlaunin í ár stefnum að því að bæta okkur enn frekar í menntamálum á þessu ári. Í haust stefnum við til dæmis að því að setja af stað leiðtogaþjálfun Samkaupa sem er hluti af endurmenntun stjórnenda“ segir Gunnur Líf.

Menntadagur atvinnulífsins er samstarfsverkefni Samorku, Samtaka ferðaþjónustunnar, Samtaka fjármálafyrirtækja, Samtaka fyrirtækja í sjávarútvegi, Samtaka Iðnaðarins, Samtaka verslunar og þjónustu og Samtaka atvinnulífins.