20/10/2026 | Bílgreinasambandið, Fréttir, Stjórnvöld, Þjónusta
Fyrirhuguð hækkun kílómetragjalds á þung ökutæki gæti haft mun meiri áhrif á rekstur flutningafyrirtækja en almennt hefur komið fram í umræðunni. Benedikt S. Benediktsson, framkvæmdastjóri Bílgreinasambandsins, varar við því að auknar álögur muni óhjákvæmilega skila sér út í verðlag og veikja samkeppnisstöðu íslenskra fyrirtækja.
Í viðtali í Reykjavík síðdegis á Bylgjunni, sem Vísir fjallaði um í gær, 19. október, bendir Benedikt á að fyrirhugaðar breytingar feli í sér samtals 15,9% hækkun kílómetragjalds milli ára. Áhrifin á þungaflutninga séu þó mun meiri.
Sem dæmi nefnir hann að gjaldið fyrir algenga samsetningu dráttarbíls og eftirvagns hækki um 27,5% og að í sumum tilvikum geti hækkunin farið yfir 30%.
Afkoman úr þriggja milljóna hagnaði í 20 milljóna tap
Til að sýna áhrifin á rekstur flutningafyrirtækja skoðaði Bílgreinasambandið ársreikning fyrirtækis í greininni fyrir árið 2024 og reiknaði út hver afkoman hefði orðið ef fyrirhugaðar breytingar hefðu þá verið í gildi.
Niðurstaðan var sláandi. Rekstur sem skilaði um þriggja milljóna króna hagnaði hefði þess í stað skilað um 20 milljóna króna tapi. Benedikt bendir jafnframt á að vörubíll sem ekur um 120 þúsund kílómetra á ári geti orðið fyrir um tveggja milljóna króna auknum árlegum rekstrarkostnaði vegna breytinganna.
Áhrifin ná langt út fyrir flutningageirann
Hækkun flutningskostnaðar hefur áhrif á alla virðiskeðjuna, meðal annars flutning dagvara, varahluta og annarra nauðsynjavara um landið. Þá getur aukinn kostnaður við flutning útflutningsafurða veikt samkeppnisstöðu íslenskra fyrirtækja.
Benedikt telur tímasetningu breytinganna sérstaklega óheppilega í ljósi mikilla hækkana á eldsneytisverði. Samkvæmt upplýsingum hans hefur verð á dísilolíu hækkað um 42% frá ársbyrjun.
Umfjöllunin undirstrikar mikilvægi þess að við breytingar á opinberum gjöldum sé horft til heildaráhrifa á atvinnulífið, verðlag og samkeppnishæfni íslenskra fyrirtækja.
Lesa má nánar um málið og hlusta á viðtalið við Benedikt S. Benediktsson HÉR!
16/10/2026 | Bílgreinasambandið, Fréttir, Stjórnvöld
Ný reglugerð um Loftslags- og orkusjóð tekur gildi 1. nóvember 2026. Með henni lækkar styrkur til kaupa á nýjum rafknúnum fólksbílum úr 500.000 kr. í 400.000 kr. og hámarksverð styrkhæfra fólksbíla lækkar úr 10 milljónum króna í 8 milljónir króna.
Breytingarnar gilda um umsóknir sem eru samþykktar frá og með 1. nóvember, óháð því hvenær bíllinn var keyptur eða pantaður. Til að eldri reglur gildi þarf umsókn að hafa verið samþykkt fyrir gildistökuna og öll skilyrði styrkveitingar að vera uppfyllt.
SVÞ vekur sérstaka athygli félagsmanna, einkum bílaumboða og bílasala, á skömmum fyrirvara til gildistöku. Mikilvægt er að kaupendur fái tímanlega réttar upplýsingar um styrkfjárhæðir, verðþak og vægi samþykktardags umsóknar.
Nánari upplýsingar má finna í frétt Umhverfis- og orkustofnunar. Fyrirspurnum má beina á orkusjodur@uos.is.
09/10/2026 | Fréttir, Innra starf, Stjórnvöld, Verslun, Viðburðir, Þjónusta
Haustréttir SVÞ 2026 – samtal, sýn og góð stemning
Umbreytingar sem skila árangri voru í brennidepli á Haustréttum SVÞ 2026, okkar árlega lokaða fundi stjórnenda innan samtakanna. Fjölbreytt dagskrá, reynslusögur úr atvinnulífinu og líflegt pallborð gáfu gestum nýja innsýn og tækifæri til að ræða næstu skref.
Í forgangsröðun þátttakenda á áherslum fyrir stjórnvöld voru lægri vextir, einfaldara regluverk og aukinn fyrirsjáanleiki efst. Einnig var kallað eftir fyrirsjáanleika í skattheimtu og minni valdheimildum Samkeppniseftirlitsins – skýr skilaboð um hvað þarf til að styrkja rekstrarumhverfi verslunar og þjónustu.
Við þökkum öllum sem tóku þátt fyrir daginn! Hér fyrir neðan deilum við sérstöku stemningsmyndbandi sem fangar fjölbreytta dagskrána, samtalið og stemninguna á Haustréttum.
01/10/2026 | Stjórnvöld, Umsagnir, Úr hagsmunagæslunni
SVÞ – Samtök verslunar og þjónustu hafa skilað umsögn um fjárlagafrumvarp ársins 2027 og frumvarp um skattabreytingar vegna fjárlaganna. Samtökin telja markmið um hallalaus fjárlög jákvætt en leggja áherslu á að aðlögun ríkisfjármála byggi fyrst og fremst á aðhaldi opinberra útgjalda. Boðaðar skattahækkanir geti aukið verðbólgu, dregið úr fjárfestingu og veikt atvinnu- og verðmætasköpun.
Í umsögninni er sérstaklega fjallað um hækkun kílómetragjalds og áhrif á vöruflutninga og vöruverð, auk þess sem kallað er eftir skýrara samhengi milli skatttekna af ökutækjum og framlaga til vegakerfisins. Þá gagnrýna SVÞ skerðingu stuðnings við orkuskipti og lækkun endurgreiðslna virðisaukaskatts vegna íbúðarhúsnæðis. Samtökin kalla jafnframt eftir betra mati á áhrifum aukinnar skattlagningar á fjármálafyrirtæki og ferðaþjónustu og skýrari rökstuðningi fyrir hækkun eftirlitsgjalds vátryggingamiðlara.
Sjá umsögn SVÞ hér -> 20261001 ums SVÞ frv. til fjárl 2027 og tekjubandormur
18/09/2026 | Stjórnvöld, Umsagnir, Úr hagsmunagæslunni
SVÞ – Samtök verslunar og þjónustu hafa skilað umsögn um áform um breytingar á ýmsum lögum um skatta og gjöld. Samtökin vara við því að lengri afgreiðslufrestur ríkisskattstjóra og þrengri skilyrði fyrir bindandi álitum geti aukið réttaróvissu. Dragist afgreiðsla of lengi geti skattaðilar þurft að framkvæma ráðstafanir áður en álit liggur fyrir og þannig misst rétt til þess.
SVÞ leggja jafnframt áherslu á að ákvæði tollalaga tryggi að tollyfirvöld geti veitt fyrirframúrskurði í samræmi við viðskiptaliprunarsamninga Íslands. Þá telja samtökin eðlilegt að samræma tollafyrirkomulag rifins mozzarellaosts með viðbættum jurtaolíum því sem tíðkast erlendis, með fyrirvara um endanlega útfærslu breytingarinnar.
Sjá umsögn SVÞ hér -> 18092026 SVÞ – ums. samr 167-2026. áform Skattar og Gjöld
17/09/2026 | Stjórnvöld, Umsagnir, Úr hagsmunagæslunni
SVÞ – Samtök verslunar og þjónustu hafa skilað umsögn um áform um innleiðingu markaðseftirlitsreglugerðar ESB. Samtökin fagna því að ekki sé fyrirhugað að ganga lengra en lágmarkskröfur reglugerðarinnar segja til um og leggja áherslu á að sú nálgun skili sér í útfærslu laganna.
Í umsögninni kalla SVÞ eftir þarfagreiningu áður en heimild til innheimtu eftirlitskostnaðar hjá fyrirtækjum er nýtt, fyrirsjáanlegum og hóflegum viðurlögum og skýrum skilyrðum fyrir beitingu valdheimilda. Eftirlitið verði áhættumiðað svo fyrirtæki sem almennt fylgja reglum sæti ekki óþarfa eftirliti eða kostnaði. Þá leggja samtökin áherslu á að svigrúm reglugerðarinnar verði greint áður en frumvarp er lagt fram, til að koma í veg fyrir séríslenskar kröfur umfram það sem innleiðingin krefst.
Sjá umsögn SVÞ hér -> 17092026 SVÞ – ums. samr 165-2026. áform Markaðseftirlit (1)
