Forystufólk úr atvinnulífinu fundaði í gær með Guðlaugi Þór Þórðarssyni utanríkis- og þróunarsamvinnuráðherra um fríverslunarviðræður Íslands, Noregs og Liechtenstein við Bretland. Samtök atvinnulífsins boðuðu til umræðnanna að ósk Guðlaugs Þórs. Brýnt er að samkomulag náist um nýjan fríverslunarsamning áður en Bretland hverfur úr EES samningnum, sem verður að óbreyttu þann 31. janúar næstkomandi.
„Samtök atvinnulífsins fagna því frumkvæði utanríkisráðherra að efna til virks samtals við atvinnulífið um hvernig hag íslenskra fyrirtækja sé best borgið í nýjum fríverslunarsamningi við Breta í kjölfar Brexit. Samstarfið hefur verið árangursríkt og verið byggt á þeirri forsendu að tryggja útflutningshagsmuni Íslands með sem bestum hætti. Ljóst er að í samningnum er feiknarlega mikið í húfi fyrir íslenskt atvinnulíf og því til mikils að vinna að hafa fengið hagaðila snemma að borðinu nú þegar fríverslunarviðræður eru að bresta á,“ segir Halldór Benjamín Þorbergsson, framkvæmdastjóri Samtaka atvinnulífsins, en samráð atvinnulífsins og stjórnvalda hefur staðið yfir síðan stuttu eftir þjóðaratkvæðagreiðslu Breta um útgöngu úr ESB í júní 2016.
Fyrir hönd atvinnulífsins sátu fundinn Helga Árnadóttir og Halldór Benjamín Þorbergsson fyrir hönd Samtaka atvinnulífsins, Guðrún Jóhannesdóttir og Andrés Magnússon fyrir hönd Samtaka verslunar og þjónustu, Ingibjörg Ólafsdóttir og Jóhannes Þór Skúlason fyrir hönd Samtaka ferðaþjónustunnar, Árni Sigurjónsson og Sigríður Mogensen fyrir hönd Samtaka iðnaðarins, Ægir Páll Friðbertsson og Heiðrún Lind Marteinsdóttir fyrir hönd Samtaka fyrirtækja í sjávarútvegi, Katrín Júlíusdóttir fyrir hönd Samtaka fjármálafyrirtækja, og Páll Erland fyrir hönd Samorku. Fyrir hönd utanríkisráðuneytisins sátu fundinn, auk Guðlaugs Þórs Þórðarsonar, Sturla Sigurjónsson, Þórir Ibsen, Borgar Þór Einarsson og Ögmundur Hrafn Magnússon.
-
Halldór Benjamín Þorgeirsson, framkvæmdastjóri SA og Helga Árnadóttir, varaformaður SA
-
Andrés Magnússon og Guðrún Jóhannesdóttir voru fulltrúar SVÞ
-
Jóhannes Þór Skúlason, framkvæmdastjóri og Ingibjörg Ólafsdóttir, varaformaður, frá Samtökum ferðaþjónustunnar
-
Katrín Júlíusdóttir, framkvæmdastjóri Samtaka fjármálafyrirtækja
-
Sigríður Mogensen, sviðsstjóri hugverkasviðs og Árni Sigurjónsson, formaður, frá Samtökum iðnaðarins
-
Heiðrún Lind Marteinsdóttir, framkvæmdastjóri og Ægir Páll Friðbertsson, varaformaður, Samtökum fyrirtækja í sjávarútvegi
-
Páll Erland, framkvæmdastjóri Samorku
-
Frá vinstri, Borgar Þór Einarsson, Guðlaugur Þór Þórðarson, utanríkisráðherra, Þórir Ibsen, aðalsamningamaður ráðuneytisins í málinu og Sturla Sigurjónsson, ráðuneytisstjóri, auk Ögmundar Hrafns Magnússonar fyrir aftan
