SVÞ sendu 17. mars 2026 umsögn um þingsályktunartillögu um endurskoðun tollameðferðar á matvælum, þar sem samtökin telja ekki þörf á frekari tollahækkunum. Þau vara við neikvæðum áhrifum á verð og samkeppni og leggja áherslu á einfaldara virðisaukaskattskerfi og endurskoðun tollverndar til að draga úr verðbólguþrýstingi.
SMELLTU HÉR til að hlaða niður umsögn um þingsályktunartillögu
SVÞ sendu 12. mars 2026 umsögn um deiliskipulag Borgarlínu á Suðurlandsbraut þar sem samtökin telja tillöguna ganga of langt gagnvart hagsmunum fyrirtækja og starfsfólks á svæðinu. Þau vara sérstaklega við verulegri fækkun bílastæða, auknum umferðarþunga og neikvæðum áhrifum á rekstur. SVÞ leggja áherslu á að skoða aðra staðsetningu Borgarlínu og stigvaxandi innleiðingu breytinga til að draga úr raski og tryggja betri samgöngur.
SVÞ sendu 2. mars 2026 umsögn um grænbók um byggðamál þar sem samtökin leggja áherslu á að góðir innviðir, sérstaklega vegasamgöngur, séu grundvallarforsenda byggðarþróunar. Þau kalla eftir markvissri uppbyggingu vegakerfisins á grundvelli kostnaðar- og ábatagreininga, aukinni vetrarþjónustu og því að tekjur af ökutækjum og umferð renni til vegamála. Þá leggja samtökin áherslu á skýrt regluverk til að styðja orkuskipti í samgöngum og benda á nauðsyn þess að nýta heimildir til að auðvelda innleiðingu rafknúinna ökutækja.
SVÞ sendu 2. mars 2026 umsögn um drög að stefnu og aðgerðaáætluninni Saman gegn sóun. Samtökin styðja markmið stefnunnar en leggja áherslu á virkt samráð við atvinnulífið, uppfærð gögn og aðgerðir sem samræmast þróun í nágrannalöndum. SVÞ vara jafnframt við að ganga lengra í kröfum en á EES-svæðinu þar sem það geti haft neikvæð áhrif á samkeppnishæfni fyrirtækja og leitt til hærra vöruverðs.
SVÞ sendu 2. mars 2026 umsögn um frumvarp um breytingar á lögum um ökutækjatryggingar.
Um þessar mundir hefur eldsneytisverð verið í umræðunni í tengslum við róttækar skattabreytingar um áramót. Í því samhengi hafa fallið ýmis orð, m.a. í þá átt að eldsneytisverð hér á landi hafi ekki þróast í samræmi við breytingar á heimsmarkaðsverði. Ekki er alltaf ljóst hvað átt er við þegar rætt er um heimsmarkaðsverð eldsneytis en t.d. hefur verið litið til heimsmarkaðsverðs á hráolíu, afhendingarverðs bensíns í New York höfn og heimsmarkaðsverð bensíns á Mið-Evrópumarkaði.
Þegar rætt er um heimsmarkaðsverð er t.d. hætt við að einhverjir líti svo á að það bensín sem er selt á Íslandi komi frá höfnum New York . Ef við skoðum hins vegar upplýsingar á vef Hagstofu Íslands sjáum við að tæp 99% alls blýlauss bensíns sem var flutt til Íslands frá upphafi árs 2023 var upprunnið í Noregi. Það bensín sem hér er selt á dælu er því líkast til ekki í raun að koma af heimsmarkaði heldur Noregsmarkaði. Af þeim sökum er eðlilegt að velta fyrir sér hvort verðþróun á innfluttu bensíni sem kemur hingað af Noregsmarkaði sé sú sama og verðþróun á heimsmarkaði.
Heimild: Hagstofa Íslands, Seðlabanki Íslands og U.S. Energy Information Administration
Líkt og sjá má á meðfylgjandi mynd hefur heimsmarkaðsverð í New York höfn umreiknað í íslenskar krónur sveiflast töluvert milli mánaða og það sama á við um innflutningsverð á bensíni sem er innflutt frá Noregi. Þótt verðbreytingarnar fylgi ekki alveg sömu sveiflum virðist þónokkur fylgni á milli þeirra á köflum ef innflutningsverð er tafið um mánuð sem kann að endurspegla tafir vegna flutnings– og afhendingartíma.
Þegar árið 2025 er skoðað sérstaklega virðist sambandið á milli þróunar á heimsmarkaðsverði og innflutningsverðs á bensíni sem er flutt inn frá Noregi vera veikara en að jafnaði á tímabilinu 2023–2024. Í október hafði heimsmarkaðsverð til að mynda lækkað um 23% frá ársbyrjun á meðan innflutningsverð á bensíni frá Noregi hafði lækkað um 9%. Þetta misræmi kann að skýrast að hluta til af töf vegna flutnings– og afhendingartíma á eldsneyti til Íslands en líkt og sjá má á myndinni er áfram töluverður munur milli heimsmarkaðsverðs og innflutningsverðs með mánaðartímatöf. Það bendir til þess að fleiri þættir en þróun heimsmarkaðsverðs hafi áhrif á innflutningsverð á bensíni frá Noregi.
Heimild: Hagstofa Íslands, Seðlabanki Íslands og U.S. Energy Information Administration
Kjarninn í þessu er sá að heimsmarkaðsverð við New York höfn er ekki fullkomið viðmið til að leggja mat á verðþróun bensíns á Íslandi. Þótt innflutningsverð á bensíni, sem hefur bein áhrif á verðmyndun innanlands, hreyfist oft í takt við heimsmarkaðsverð líkt og fjallað er um hér að framan er sambandið þar á milli misríkt og virðist hafa verið veikara árið 2025 en árin á undan.