22/01/2020 | Fræðsla, Fréttir, Þjónusta
Það var mikið rætt og hlegið á einstaklega gagnlegum og skemmtilegum morgunfyrirlestri um þjónustusímsvörun með þjónustusérfræðingnum Margréti Reynisdóttur hjá Gerum betur. Ekki spillti fyrir að með henni var góður gestur, Örn Árnason leikari, sem fór á kostum við að glæða lífi hin ýmsu dæmi sem læra mátti af. Líflegar umræður spunnust og óhætt að segja að allir hafi farið reynslunni ríkari frá okkur þann morguninn.
Í tilefni af fyrirlestrinum býður Margrét sérkjör á nýútkominni bók sinni um þjónustusímsvörun næstu þrjár vikurnar. Og hún gerir enn betur og býður sértilboð á rafrænu námskeið um sama efni. Þú getur nálgast bókina hér og námskeiðið hér og með kóðanum svth færðu 20% afslátt.
22/01/2020 | Fræðsla, Fréttir, Viðburðir
Fjölmenni var á fundi sem SVÞ hélt ásamt Samtökum ferðaþjónustunnar, Íslandsstofu, Ferðamálastofu og Íslensk-kínverska viðskiptaráðinu á Grand hótel í morgun undir yfirskriftinni „Hvernig tökum við á móti ferðamönnum frá Kína“.
Á fundinum hélt sendiherra Kína á Íslandi erindi þar sem fram kom m.a. mikil fjölgun ferðamanna frá Kína á síðustu árum og að með vorinu munu tvö flugfélög hefja beint flug á milli Íslands og Kína.
Thea Hammerskov, forstöðumaður viðskiptaþróunar Visit Copenhagen kynnti það sem þau hafa verið að gera varðandi markaðssetningu á Kaupmannahöfn til kínverskra ferðamanna og jafnframt Chinavia fræðsluefnið til að aðstoða fyrirtæki við að mæta þörfum þeirra og væntingum. Efnið er opið á netinu og tilvalið fyrir íslensk fyrirtæki að nýta sér það: https://www.wonderfulcopenhagen.com/chinavia
Ársæll Harðarson, svæðisstjóri Icelandair í Asíu hefur unnið á þessum markaði í fjölmörg ár og miðlað af reynslu sinni og þekkingu varðandi markaðssetningu í Kína.
Að lokum miðlaði Grace – Jin Liu af reynslu sinni, en Grace hefur verið leiðsögumaður fyrir kínverska ferðamenn á Íslandi um árabil.
Fundinum var streymt á Facebook síðu Ferðamálastofu og má sjá hér fyrir neðan. Þarna er mjög mikið af gagnlegum upplýsingum sem fyrirtæki í verslun og þjónustu geta nýtt sér og við hvetjum alla til að horfa.
Erindi sendiherra hefst: -2.10.32
Erindi Thea Hammerskov er í tveimur hlutum og hefst fyrri hlutinn -1:48.20 og síðar hlutinn -1:31:01
Erindi Ársæls Harðarsonar hefst: -1:04:34
Erindi Grace – Jin Liu hefst svo á -29:26 en tæknilegir örðugleikar seinkuðu því að það gæti hafist á tíma.
20/01/2020 | Fræðsla, Fréttir, Umhverfismál
Nýlega bauðst fyrirtækjum innan SVÞ að sækja vinnustofur með þeim Vilborgu Einarsdóttur og Kjartani Sigurðssyni frá BravoEarth. Á vinnustofunum fóru þau Vilborg og Kjartan yfir helstu atriði sem snúa að mótun, utanumhaldi og innleiðingu umhverfisstefnu.
Fjölmargir aðilar hafa sett sig í samband við okkur sem hafa áhuga á vinnustofu sem þessari en höfðu ekki tök á að taka þátt þegar þær fóru fram. Ef næg þátttaka fæst eru þau Vilborg og Kjartan tilbúin að skella í eina vinnustofu í viðbót. Áhugasamir vinsamlegast smelli hér og skrái sig og við munum vera í sambandi!
Fyrirtæki um allan heim eru að móta og innleiða umhverfisstefnu með það að markmiði að minnka sóun, nýta auðlindir betur og axla þannig ábyrgð fyrir framtíðina. Umhverfisstefna snertir alla starfsemi fyrirtækisins og er því mikil áskorun fólgin bæði í mótun og innleiðingu, þ.e. að framfylgja stefnunni. Mikilvægt er að virkja starfsmenn til að geta samstillt aðgerðir og fá starfsmenn til að breyta hegðun.
Ávinningur við innleiðingu á umhverfisstefnu er m.a.:
- Betri afkoma: Minni sóun og betri nýting á auðlindum skilar sér í betri rekstrarniðurstöðum fyrir utan mikilvægi þess að vinna gegn loftslagsbreytingum.
- Aukið stolt og starfsánægja: Það veldur mörgu starfsfólki vanlíðan að horfa upp á sóun á sínum vinnustað. Minni sóun og aukin umhverfisvernd skila sér í stoltara og ánægðara starfsfólki.
- Bætt ímynd: Fólk beinir í auknum mæli viðskiptum sínum til þeirra sem standa sig vel í umhverfismálum. Árangursrík innleiðing er því gríðarlega mikilvæg fyrir verslun og þjónustu.
Við hvetjum öll fyrirtæki, hvort sem er í verslun, þjónustu eða öðrum geirum, til að huga vel að þessum málum.
09/01/2020 | Fræðsla, Fréttir, Umhverfismál, Viðburðir
Þátttakendur voru mjög áhugasamir á morgunfyrirlestri SVÞ um mótun, utanumhald og innleiðingu umhverfisstefnu, sem haldinn var nýverið. Fyrirlesturinn héldu Vilborg Einarsdóttir og Kjartan Sigurðsson frá BravoEarth en Vilborg er sérfræðingur í breytingastjórnun og Kjartan í sjálfbærni, samfélagslegri ábyrgð og viðskiptasiðferði.
Í fyrirlestrinum kom m.a. fram að fyrirtæki eru í auknum mæli að marka sér umhverfisstefnu til að minnka sóun, nýta betur auðlindir og minnka kolefnisspor. Einnig hefur sýnt sig að innleiðing umhverfisstefnu skilar sér í betri afkomu fyrirtækja, auknu stolti og ánægju starfsfólks og bættri ímynd. Umhverfisstefna snertir alla starfsemi fyrirtækja og alla starfsmenn og helsti vandinn liggur almennt í innleiðingu stefnunnar, þ.e. að samstilla aðgerðir og fá starfsmenn til breyta hegðun. Farið var yfir leiðir til þess að innleiða umhverfisstefnu á áhrifaríkan hátt og virkja starfsfólk til árangurs.
SVÞ félagar geta séð upptöku af fyrirlestrinum inni í lokaða Facebook hópnum okkar hér.
Í framhaldi af fyrirlestrinum eru fríar vinnustofur í boði fyrir SVÞ félaga þar sem þeir geta fengið aðstoð við mótun, utanumhald og innleiðingu umhverfisstefnu. KYNNTU ÞÉR VINNUSTOFURNAR HÉR!
