Þar sem styttist í að breytingar á persónuverndarlöggjöf taki gildi á Evrópska efnahagssvæðinu þá árréttuðu Evrópusamtök verslunar (EuroCommerce), sem SVÞ eru aðili að, fyrr í vikunni mikilvægi þess að fyrirtæki grípi til aðgerða til að tryggja eftirfylgni með þeim breytingum. EuroCommerce hafa þegar birt upplýsingabækling sem varpar ljósi á helstu breytingar sem framundan eru og má nálgast þær leiðbeiningar inni á heimasíðu samtakanna á eftirfarandi vefslóð: Data Protection Guide – EuroCommerce
Til frekari undirbúnings vegna boðaðra breytinga hafa fulltrúar EuroCommerce átt fundi með framkvæmdastjórn Evrópusambandsins, sér í lagi þeim framkvæmdastjórum sem bera ábyrgð á þessum málaflokki, þar sem farið hefur verið yfir ýmis álitamál. Í tilefni þessa er hér með vakin athygli á upplýsingasíðu Evrópusambandsins þar sem finna má ýmsan fróðleik og upplýsingar sem geta komið að notum við þá vinnu að innleiða breytingar í starfsemi fyrirtækja. Þessar upplýsingar má nálgast á heimasíðu framkvæmdastjórnar sambandsins: Data Protection Rules – EU
EuroCommerce hefur boðað að samtökin muni birta frekari upplýsingar og annað efni í mars nk. til tryggja bæði eftirfylgni innan verslunargeirans sem og aukna vitundavakningu um það breytta landslag sem framundan er í þessum málum.
Rannsóknarfyrirtækið Zenter framkvæmdi nýlega rannsókn á viðhorfi Íslendinga til íslenskrar verslunar. Hér á eftir fylgja lýsing á aðferðarfræði rannsóknarinnar, þær spurningar sem lagðar voru fyrir þátttakendur, ásamt helstu niðurstöðum.
Lýsing á rannsókn
Framkvæmdaraðili: Zenter rannsóknir
Framkvæmdatími 4. til 18. desember 2017.
Aðferð: Netkönnun meðal könnunarhóps Zenter rannsókna, einstaklingar 18 ára og eldri.
Svarfjöldi: 1038 einstaklingar.
Svarhlutfall: 57%
Þátttakendur voru spurðir eftirfarandi spurninga:
„Hversu mikla eða litla þekkingu hefur þú á verslun á Íslandi?“
„Þegar á heildina er litið, hversu jákvæð eða neikvæð er upplifun þín af verslun á Íslandi?“
„Hversu mikið eða lítið traust berð þú til verslunar á Íslandi?“
„Hver af eftirfarandi fullyrðingum endurspeglar best viðhorf þitt til verslunar á Íslandi?“
Niðurstöður rannsóknar um ímynd verslunar á Íslandi
Nýlega framkvæmdi Zenter rannsóknir könnun fyrir Samtök verslunar og þjónustu á ímyndarþáttum er varða verslun á Íslandi. Samkvæmt niðurstöðum könnunar ber meirihluti Íslendinga mikið eða eitthvað traust til verslunar á Íslandi (67%). Niðurstöður sýna einnig að mikill meirihluti Íslendinga telur sig hafa mikla eða einhverja þekkingu á verslun á Íslandi (88%). Þar að auki benda niðurstöður til að flestir hafa jákvæða (40%) eða hvorki jákvæða né neikvæða (38%) upplifun á verslun á Íslandi. Að lokum voru þátttakendur spurðir um viðhorf til verslunar á Íslandi og sögðust 17% tala vel um verslun á Íslandi, 44% voru hlutlausir og 30% tala um hana á gagnrýninn hátt. Um 9% svarenda höfðu ekki sterka skoðun á verslun á Íslandi eða tóku ekki afstöðu til spurningarinnar.
Hversu mikla eða litla þekkingu hefur þú á verslun á Íslandi?
Þegar á heildina er litið, hversu jákvæð eða neikvæð er upplifun þín af verslun á Íslandi?
Hversu mikið eða lítið traust berð þú til verslunar á Íslandi?
Hver af eftirfarandi fullyrðingum endurspeglar best viðhorf þitt til verslunar á Íslandi?
SVÞ – Samtök verslunar og þjónustu ítreka að í maí nk. munu koma til framkvæmda umfangsmestu breytingar sem gerðar hafa verið á evrópskri persónuverndarlöggjöf í rúm 20 ár og fyrir þann tíma þurfa fyrirtæki að aðlaga starfsemi sína að breyttum – og auknum – kröfum til persónuverndar og öryggis persónuupplýsinga.
Fátt hefur verið meira til umfjöllunar á opinberum vettvangi undanfarin ár en boðaðar breytingar á persónuverndarlöggjöfinni. Er um að ræða breytingar sem tilkomnar eru vegna reglugerðar Evrópusambandsins sem brátt mun verða hluti af regluverki samningsins um Evrópska efnahagssvæðið. Ljóst er að þessar breytingar hafa nú þegar kallað á ríka endurskoðun fyrirtækja á núverandi framkvæmd og fyrirkomulagi þeirra er viðkemur söfnun, vinnslu og miðlun á persónuupplýsingum.
SVÞ hafa þegar haldið tvo félagsfundi um boðaðar breytingar. Annars vegar í desember 2016 þar sem forstjóri og fulltrúar Persónuverndar fóru yfir helstu breytingar og áhrif þeirra hér á landi, og hins vegar í desember á síðasta ári þar sem enn og aftur var farið yfir þessi álitamál. Meðfylgjandi eru til upplýsingar glærur af fundinum í desember sl. ásamt upptöku af þeim fundi.
Eins og áður segir munu boðaðar breytingar taka gildi í maí nk. og verða brátt kynnt til umsagnar á vettvangi stjórnvalda drög að frumvarpi til innleiðingar á regluverkinu. Því er mikilvægt að fyrirtæki séu vel undir það búin að aðlaga starfsemi sína að breyttum reglum. Á margan hátt mun hið nýja regluverk fela í sér áréttingu á núgildandi kröfum en þó er þar að finna nýjar og ítarlegar kröfur til verndar réttindum einstaklinga.
SVÞ telja því verulega mikilvægt að fyrirtæki hugi vel að þeim breytingum og hvernig þær kunna að hafa áhrif á starfsemi þeirra. SVÞ hafa útbúið gátlista fyrir fyrirtæki um þau atriði sem vert er að taka til skoðunar vegna boðaðra breytinga sem taka mun gildi með nýjum persónuverndarreglum. Þá munu Samtök atvinnulífsins birta um miðjan febrúar ítarlegar upplýsingar og ýmsan fróðleik um þessar breytingar inni á vinnumarkaðsvef á heimasíðu samtakanna.
Blaðagrein birt í Morgunblaðinu 7. 2.2018 Höfundur: Margrét Sanders, formaður Samtaka verslunar og þjónustu
Í nýrri könnun eins virtasta markaðsfyrirtækis landsins mælist íslensk verslun með 67% traust íslensku þjóðarinnar. Til hamingju verslunarmenn, til hamingju Íslendingar.
Sjálfstæðisbaráttan tengdist verslun
Það er mikilvægt hverri atvinnugrein að starfa í sátt og samlyndi við samfélag sitt. Íslensk verslun hefur um aldir verið nátengd hagsmunum þjóðarinnar, enda var það eitt af stóru hagsmunamálunum í sjálfstæðisbaráttu okkar, að verslunin kæmist í okkar eigin hendur. Sú barátta stóð lengi og var að lokum farsællega til lykta leidd af sjálfstæðishetjum okkar, eins og svo vel er lýst í því stórkostlega ritverki “ Líftaug landsins – saga íslenskrar utanríkisverslunar 900 – 2010”, sem nýlega kom út.
Samfélagsmiðlar gefa rödd
Fullyrða má að fáar ef nokkrar atvinnugreinar hafa búið við jafn óvæga gagnrýni og verslunin hefur mátt sæta, og hefur verslunin margoft verið skotspónn þeirra sem hafa séð sér hag í því að tortryggja hana. Nú í seinni tíð hefur almenningur fengið rödd í gegnum samfélagsmiðlana. Virðist sú umræða vera að ná jafnvægi og snúast meira um neytendavernd, þjónustu og upplýsta umræðu sem verslunin fagnar. Það vita allir sem reynt hafa hversu erfitt getur verið að rísa undir gagnrýni sem þessari. Íslensk verslun hefur hingað til staðið allt slíkt af sér og það er engin ástæða til að ætla annað en svo verði áfram.
Tæplega 70% traust
Það er sérstakt ánægjuefni að finna hversu mikillar velvildar íslensk verslun nýtur núna meðal þjóðarinnar, sérstaklega í ljósi umræðunnar. Í fyrrgreindri könnun kemur fram að um 67% þjóðarinnar bera traust til verslunar á Íslandi. Þessi niðurstaða er mjög ánægjuleg, ekki síst í því ljósi þess að opinber umræða um atvinnugreinina var óneitanlega fremur neikvæð á s.l. ári. Að finna að verslunin nýtur svo mikils trausts og velvildar hjá þjóðinni er greininni mikil hvatning til þess að gera enn betur.
Sóknarhugur á tíma breytinga
Íslensk verslun er í sóknarhug. Framundan eru miklar áskoranir í síbreytilegu umhverfi, umhverfi sem tekur meiri og hraðari breytingum en nokkru sinni fyrr. Íslensk verslun er staðráðin í því að aðlaga sig að þessum breytingum, vera áfram öflugur þátttakandi í íslensku atvinnulífi og halda áfram að þjóna vel kröfuhörðum neytendum. Þannig gerum við betur, þannig eflist íslensk verslun og þannig höldum við þessu öfluga trausti Íslendinga – okkur öllum til hagsbóta.
Póstyfirvöld í Svíþjóð – Postnord og sænsk tollayfirvöld voru ekki sammála um hverjir væru ábyrgir fyrir því að innheimta virðisaukaskatt af vörum sem Svíar kaupa í netverslun frá Kína. Vegna þessa er talið að sænska ríkið hafi farið á mis við milljarða sænskra króna vegna tapaðra skatttekna.
Komið hefur í ljós að tollayfirvöld hafa látið þetta viðgangast því fjöldi póstsendinga er það mikill að kerfið ræður ekki við að innheimta virðisaukaskatt af öllum þeim vörum sem berast. En engu að síður er þetta brot á tollareglum og því hefur verið gagnrýnt að Postnord, sem er að hluta til í eigu sænska og danska ríkisins, komist upp með að innheimta ekki skattinn fyrir ríkið. Postnord hefur borið fyrir sig að vörur sem kosta undir 22 Evrur beri ekki virðisaukaskatt. Nú er orðið ljóst að ábyrgðin liggur hjá Postnord.
Markaðsmál lítilla og meðalstórra fyrirtækja voru í kastljósinu á Smáþingi Litla Íslands á Hilton Reykjavík Nordica fimmtudaginn 1. febrúar. Tölur um umfang og mikilvægi lítilla og meðalstórra fyrirtækja voru birtar á þinginu auk þess sem bent var á leiðir til að bæta starfsumhverfið. Frumkvöðlar sögðu skemmtilegar sögur og tóku þátt í umræðum.
Á fjórða hundrað gesta tóku þátt í þinginu og rúmlega 1.500 horfðu á beina útsendingu á vefnum.
Hvernig á að ná í nýja viðskiptavini og halda núverandi viðskiptavinum?
Hvað er að gerast á markaðnum?
Hvernig nærðu árangri með markaðsstarfi?
Hvernig er hægt að nota samfélagsmiðla með nýjum hætti?
Hvaða áhrif hafa áhrifavaldar?
Forsætisráðherra Íslands, Katrín Jakobsdóttir, setti þingið Guðný Helga Herbertsdóttir, framkvæmdastjóri stafrænnar þróunar hjá VÍS, stýrði því.
Litla Ísland er vettvangur þar sem lítil fyrirtæki vinna að stórum hagsmunamálum. Bakhjarlar Litla Íslands eru SAF, SVÞ, SI, SFF og SA.
