04/03/2022 | Fréttir
Ísland hefur tekið undir allar pólitískar yfirlýsingar ESB undanfarna daga varðandi þvingunaraðgerðir gegn Rússlandi vegna innrásarinnar í Úkraínu. Við höfum þannig skuldbundið okkur til þess að láta sömu reglur gilda hér á landi.
Innleiðingarferli á Íslandi
Þvingunaraðgerðir eru innleiddar í íslenskan rétt á grundvelli laga um framkvæmd alþjóðlegra þvingunaraðgerða.
Á vef stjórnarráðsins er að finna lista yfir alþjóðlegar þvingunaraðgerðir í gildi á Íslandi. Reglugerðum er sífellt bætt við eftir því sem þær eru innleiddar. T.d. má fara í landalista og velja plúsinn við Rússland, Úkraínu eða Belarús til að sjá lista yfir reglugerðarbreytingar.
Á vefslóðinni má skrá sig á póstlista og þá berst tölvupóstur hvert sinn sem ný reglugerð um þvingunaraðgerðir er birt á Íslandi.
Ísland innleiðir ESB gerðirnar og tryggir þannig einsleitni með ESB. Þannig eru efnislegar gerðir ESB birtar þýddar í viðaukum (ath. að smella þarf á PDF útgáfu skjalsins til þess að sjá viðaukana). Þegar eingöngu er um að ræða breytingar á listum yfir aðila sem sæta þvingunaraðgerðum, eða breytingar á listum yfir tækni, hluti og annað, er vísað til birtingar í Stjórnartíðindum ESB og gefin upp vefslóð í viðauka við reglugerðina.
EU Sanctions Map sem ESB heldur úti veitir aðgengilegt yfirlit um gildandi aðgerðir, hefur krækjur á gerðir þar sem allar breytingar hafa verið felldar inn og þannig eru þær aðgengilegri (consolidated versions). Á þessari síðu má slá upp nöfnum á einstaklingum og lögaðilum og kanna hvort þeir séu á lista hjá ESB. Ef svo er eru mjög miklar líkur á að sá listi sé í gildi hér á landi, eða muni fljótlega taka gildi. Aðgerðirnar varða Úkraínu, Rússland og Belarús.
Unnið er að innleiðingu á þvingunaraðgerðum sem samþykktar hafa verið undanfarna daga og birtist fyrsta reglugerðin 28. febrúar í Stjórnartíðindum. Þessi reglugerð er breyting á gildandi reglugerð nr. 281/2014 um þvingunaraðgerðir varðandi Úkraínu með síðari breytingum, og innleiðir fyrsta pakka þvingunaraðgerða ESB sem birtur var í Stjórnartíðindum ESB 23. febrúar sl. Sá pakki var settur í kjölfar viðurkenningar á svæðunum tveimur, Luhansk og Donetsk, og fyrirskipana um að herlið skuli fara inn á svæðin. Gerðir ESB sem innleiddar eru með þessari reglugerð eru breytingar á gildandi ESB gerðum gegn Rússlandi vegna Úkraínu síðan 2014, fyrir utan tvær nýjar gerðir sem bættust við vegna svæðanna tveggja.
Fjármálaeftirlit Seðlabanka Íslands hefur birt fréttatilkynningu á vef sínum til þess að árétta skyldu tilkynningarskyldra aðila skv. a-k lið 1. mgr. 2. gr. laga nr. 140/2018 um aðgerðir gegn peningaþvætti og fjármögnun hryðjuverka til að fylgja lögum nr. 64/2019 um frystingu fjármuna o.fl. Sjá frétt Seðlabanka Íslands um auknar þvingunaraðgerðir Evrópusambandsins gegn Rússlandi.
Inntak þvingunaraðgerða ESB sem eru í innleiðingu á Íslandi vegna innrásarinnar
Ísland tekur fullan þátt í þvingunaraðgerðum ESB og eru þær innleiddar með reglugerðum eins fljótt og unnt er.
SJÁ NÁNARI ÚTFÆRSLU Á VEF STJÓRNARRÁÐSINS
28/02/2022 | Fréttir, Innra starf
Rafræn kosning meðstjórnenda í stjórn SVÞ 2022 hefst mánudaginn 28. febrúar kl. 12:00 og stendur til kl 12:00 þann 15. mars nk. Félagsaðilar fá senda tilkynningu við upphaf kosningar en í henni munu m.a. koma fram upplýsingar um hvernig atkvæði verða greidd.
Kosið er um þrjá meðstjórnendur til tveggja ára og einn til árs. Alls bárust fimm framboð.
Hver félagsaðili fer með atkvæði í hlutfalli við greidd félagsgjöld ársins 2021. Hverjum heilum 1.000 krónum í greidd félagsgjöld fylgir eitt atkvæði. Tekið skal fram að enn er hægt að öðlast atkvæðisrétt með greiðslu vangoldinna félagsgjalda ársins 2021.
Í framboði til stjórnar SVÞ 2022 eru:
Edda Rut Björnsdóttir,
Framkvæmdastjóri Mannauðs-og samskiptasviðis Eimskips
Edda hefur verið framkvæmdastjóri Mannauðs- og samskiptasviðs Eimskips síðan snemma árs 2020 en sviðinu tilheyra mannauðs-, markaðs-, samskipta- og sjálfbærnimál ásamt fjárfestatengslum og þjónustustefnu félagsins. Áður starfaði hún sem markaðs- og samskiptastjóri félagsins. Edda hefur yfir 20 ára fjölbreytta reynslu úr atvinnulífinu en hún starfaði í 8 ár í upplýsingatæknigeiranum sem sérfræðingur í verslunarlausnum. Þá starfaði hún hjá Íslandsbanka í ýmsum hlutverkum í rúm 12 ár, síðast sem forstöðumaður sölu og viðskiptastýringar á Fyrirtækja- og fjárfestasviði.
Edda situr í stjórn Eimskip Ísland ehf. og Advania á Íslandi. Hún er með BSc í viðskiptafræði með áherslu á tölvunarfræði frá Háskólanum í Reykjavík.
„Til að tryggja samkeppnishæfni fyrirtækja í þeim hröðu breytingum sem eru að eiga sér stað í alþjóðlegu atvinnulífi þarf að hafa ríka aðlögunarhæfni, huga vel að mannauði, fylgja örum tæknibreytingum og þróun í sjálfbærnimálum. Þá þarf rekstrarumhverfið að vera hvetjandi. Samtök verslunar og þjónustu eru afar mikilvægt afl til gæta hagsmuna fyrirtækja í þessum þáttum. Ég vil leggja mitt af mörkum og tel að tæknibakgrunnur minn, reynsla og þekking í mannauðs-, markaðs-, samskipta- og sjálfbærnimálum ásamt víðtækri reynslu í sölu og þjónustustýringu geti komið að góðum notum í stjórn SVÞ til að efla samkeppnishæfni íslenskra fyrirtækja.“ ~ Edda Rut Björnsdóttir
_____________________
Héðinn Gunnarsson,
Forstöðumaður umbóta og þróunar hjá Póstinum
Starfsheiti: Forstöðumaður umbóta og þróunar hjá Póstinum
Menntun: Can ocon viðskiptafræði Háskóli Íslands.
Starfsreynsla: Samskip, Ísaco, TNT Hraðflutningar, Íslandspóstur.
Aðildarfyrirtæki: Íslandspóstur
Um Héðinn:
Héðinn Gunnarsson hefur starfað sem forstöðumaður umbóta og þróunar hjá Íslandspósti frá árinu 2019 og tekið þátt í umbreytingu félagsins frá þeim tíma.
Sérsvið Héðins liggur í rekstri fyrirtækja sem starfa á kvikum markaði og eru að ganga í gegnum umbreytingar. Héðinn hefur unnið við stjórnun fyrirtækja í yfir 25 ár, þar sem hans hans helsta áhersla hefur verið í flutningastarfsemi innlands og erlendis. Þar hefur reynt á mikla sérþekkingu og reynslu á íslenskum fyrirtækjamarkaði og auk samskipta við hið opinbera.
Íslensk samfélag í heild sinni og þá sérstaklega innlend fyrirtæki eru að ganga í gegnum miklar breytingar á umhverfi, sérstaklega vegna stafrænar þróunar og breytts landslags í verslun. Ég hygst nýta reynslu mína til þess að styðja við þá umgjörð sem breytingar á neysluháttum fela í sér og sem íslensk fyrirtæki standa frammi fyrir, en ég tel að kröfur neytenda til aukinnar sjálfbærni kalli á breytta nálgun. Sem stjórnandi til margra ára innan flutningageirans bý ég yfir þekkingu og reynslu sem mun nýtast vel innan SVÞ. Það er mikið verk að þróa umgjörð verslunar og þjónustu fram á veginn.
„Mér er annt um þróun og samkeppnishæfni íslenskra fyrirtækja, að til staðar sé hvetjandi rekstrarumhverfi og sterk staða, ekki síst í samhengi við alþjóðamarkaði.“ ~ Héðinn Gunnarsson
_____________________
Óskar Sigurðsson,
Viðskiptafræðingur, M.Sc., M.Acc. & Löggiltur verðbréfamiðlari Accountant ehf.
Býr í Vogahverfi í Reykjavík og er 46 ára, stundar líkamsrækt, og hefur gaman af því að fara í göngur upp á fjöll með betri helmingnum.
Reynsla í atvinnulífinu:
Hefur rekið skrifstofuna Accountant ehf. síðan 2012 í 100% starfi og sinnt bókhaldi og annari vinnu fyrir lítil og meðalstór fyrirtæki.
Master í alþjóðaviðskiptum frá Kaupmannahöfn, master í endurskoðun og reikningsskilum frá Háskóla Íslands, er löggiltur verðbréfamiðlari og kláraði B.Sc. í viðskiptfræði frá HÍ árið 2001.
Hefur verið í stjórnum húsfélaga og m.a. sinnt starfi formanns í nokkur ár.
Óskar vill leiða til aukinnar fræðslu og þekkingar til fyrirtækja á sviði:
- Fjármála og bókhalds
- Tækni
- Markaðsmála
- Umhverfismála
Baráttumál:
Ég vil leggja áherslu á baráttu lítilla og meðalstóra fyrirtækja í baráttunni við stór fyrirtækin og Ríkissjóðs í formi;
– bættra kjara er varða skatta- og styrkjamál
– hverskonar mismunun í viðskiptum
– að virkri samkeppni sé haldið uppi ~ Óskar Sigurðsson
_____________________
Brynjúlfur Guðmundsson,
framkvæmdastjóri Artasan ehf.
Brynjúlfur Guðmundsson er framkvæmdastjóri Artasan ehf., sem er heildsala á lyfja- og heilsuvörumarkaði. Hann hefur starfað hjá fyrirtækinu allt frá árinu 2007. Fyrst sem sölu og markaðsstjóri og síðan sem framkvæmdastjóri frá árinu 2011. Þar áður vann hann sem ráðgjafi hjá Accenture í London í Bretlandi. Brynjúlfur er með MBA og B.Sc. gráður í Alþjóðamarkaðsfræði frá Háskóla Reykvíkur.
Brynjúlfur hefur stýrt Artasan ehf. í gegnum miklar breytingar og vöxt, ásamt því að sitja í framkvæmdastjórn Veritas, móðurfélags Artasan. Hann hefur því víðtæka reynslu í stjórnun og stefnumótun, atvinnurekstri og hagsmunabaráttu á sviði viðskipta almennt.
Frá árinu 2015 hefur hann verið virkur í starfi SVÞ, sem formaður lausasölulyfjahóps SVÞ, og barist fyrir auknu frelsi í sölu og markaðssetningu lausasölulyfja og einföldun á regluverki er varðar dreifingu og sölu lyfja almenntá Íslandi.
„Ég trúi því að íslensk fyrirtæki eigi að njóta álíka laga- og rekstrarumhverfis og er í þeim löndum sem við berum okkur yfirleitt saman við. Erlend samkeppni er stöðugt að aukast og því vil ég standa vörð um íslenska verslun og gera rekstrarumhverfi innlendra fyrirtækja hagkvæmara, m.a. með því að ýta úr vegi óþarfa hindrunum, sem auka kostnað sem lendir alltaf að lokum á neytendum. Einnig þarf að huga að framþróun tæknimála og reyna að sjá fyrir hvaða áhrif sífelld ný tækniþróun muni hafa á getu fyrirtækja við að innleiða nýjar tæknilausnir, og að starfsfólk hafi aðgang að nauðsynlegri símenntun til að geta orðið þátttakendur í samfélagi og viðskiptaumhverfi morgundagsins.
Ég hef mikla reynslu og þekkingu á lyfjamarkaðnum, heildsölustarfsemi og sölu og markaðsmálum, sem ég tel að geti nýst SVÞ. Ég býð því fram krafta mína í stjórn samtakanna.“ ~ Brynjúlfur Guðmundsson.
_____________________
Gunnar Egill Sigurðsson
Framkvæmdastjóri verslunarsviðs Samkaupa hf.
Gunnar Egill Sigurðsson er framkvæmdastjóri verslunarsviðs Samkaupa sem eiga og reka Nettó, Kjörbúðina, Krambúðina og Iceland. Gunnar hefur víðtæka stjórnarreynslu og hefur starfað á smásölumarkaði í 19 ár og situr í stjórn Háskólans á Bifröst.
Gunnar Egill var kjörin í stjórn SVÞ árið 2018 og sækist nú eftir endurkjöri í annað sinn.
„Ég hef mikinn áhuga á að starfa áfram innan stjórnar SVÞ og beita mér fyrir fimm megin þáttum:
· Auka veg og virðingu verslunar í þjóðfélaginu
· Fylgja eftir nýrri námslínu í samstarfi við Verslunarskóla Íslands
· Frekara afnám verndartolla til hagsbóta fyrir neytendur
· Tækniframfarir í íslenskri verslun
· Aukna umhverfisvitund í íslenskri verslun“ ~ Gunnar Egill Sigurðsson
17/02/2022 | Fréttir, Í fjölmiðlum
Morgunblaðið birtir í dag frétt um auka aðalfund Bílgreinasambandsins (BGS) þar sem tillaga stjórnar um sameiningu við SVÞ var samþykkt einróma.
Í ljósi reynslunnar af góðu samstarfi milli SVÞ og BGS undanfarin ár ákváðu stjórnir samtakanna að tillaga um sameiningu yrði lögð fyrir aðalfundi samtakanna. Niðurstaða auka aðalfundar BGS (Bílgreinasambandsins) var einróma samþykki sameiningar við SVÞ.
Aðalfundur SVÞ fer fram 17.mars n.k. og verði sameiningin samþykkt á þeim fundi, mun sameiningin taka gildi frá og með 1.apríl 2022.
SJÁ FRÉTT FRÁ MORGUNBLAÐINU HÉR
14/02/2022 | Fréttir, Í fjölmiðlum, Verslun
Innherji á VÍSI.is fjallar í dag um nýjustu tölur frá Rannsóknasetri verslunarinnar.
Í fréttinni kemur m.a. fram að heildarkortavelta Íslendinga innanlands nam rúmum 66 milljörðum króna í janúar á þessu ári og jókst um 3,4 prósent frá sama tímabili árið áður miðað við breytilegt verðlag. Er þetta minnsti vöxturinn á milli ára frá því í október 2020. Þá bendir Innherji einnig á að áfram er mikil aukning í kortaveltu í verslun á netinu sem jókst um 22 prósent í janúar og var samtals 11,3 milljarðar króna. Ef horft er aftur til janúar 2020 þá nemur aukningin tæplega 200 prósentum.
LESA ALLA FRÉTT HÉR
06/02/2022 | Fréttir, Í fjölmiðlum
Tvær meginástæður eru fyrir því að dagvöruverðshækkanir vegna faraldursins koma fyrst fram núna að sögn SVÞ.
Andrés Magnússon, framkvæmdastjóri Samtaka verslunar og þjónustu, segir í viðtali við Viðskiptablaðið í dag að það eru tvær meginástæður fyrir því að verðlagshækkanir á innfluttri mat- og dagvöru eru að koma fram fyrst núna, en verslunarmenn segjast eiga miklar hækkanir í vændum frá sínum birgjum og hafa varað við yfirvofandi holskeflu verðhækkana í kjölfarið.
„Fyrir það fyrsta tekur tíma frá því að kornið er skorið á akrinum þar til það verður að fullbúinni neysluvöru. Þetta er töluvert ferli. Að sama skapi tekur það því tíma fyrir áhrifin af hrávöruverðshækkunum að koma fram í verðlagi neytendavara. Hitt er það að tilkynningar erlendra birgja um verðbreytingar berast svo til alltaf í upphafi árs. Heildsalarnir eru að fá þessar tilkynningar mjög mikið þá. Þannig hefur það alltaf verið,“ bendir Andrés á í viðtalinu.
SMELLIÐ HÉR TIL AÐ LESA ALLT VIÐTALIÐ
31/01/2022 | Fréttir, Innri
SVÞ aðstoðar í málum fyrir kærunefnd vöru- og þjónustukaupa
Á haustmánuðum veitti skrifstofa SVÞ aðildarfyrirtæki samtakanna aðstoð í málum fyrir kærunefnd vöru- og þjónustukaupa.
Vara hafði verið boðin til sölu á tilboðsverði, bæði í netverslun og hefðbundinni smásöluverslun, en þau mistök gerð að rangt söluverð var tilgreint. Nam hið rangt tilgreinda tilboðsverð aðeins 10% af því verði sem til stóð að bjóða enda vantaði einn tölustaf í verðmerkinguna.
Nokkrir neytendur höfðu pantað vöruna í netverslun og greitt fyrir. Þegar verslunin varð mistakanna var, áður en til afhendingar kom, hafði hún samband við kaupendur, upplýsti um mistökin, endurgreiddi kaupverðið og tilkynnti að hún teldi sér ekki skylt að standa við söluna í ljósi aðstæðna.
Tveir kaupenda óskuðu úrskurða kærunefndar vöru- og þjónustukaupa og kröfðust þess fyrir nefndinni að versluninni yrð gert að afhenda söluvörurnar gegn greiðslu hins rangt tilgreinda tilboðsverðs. Kærunefndin hafnaði kröfum þeirra beggja.
Í málunum reyndi á ákvæði 5. mgr. 3. gr. reglna nr. 536/2011, um verðmerkingar og einingarverð við sölu á vörum, sem er efnislega á þá leið að fyrirtækjum sé skylt að selja vöru á því verði sem verðmerkt er, einnig þótt um mistök sé að ræða, nema kaupanda megi vera mistökin ljós. Fá dæmi eru um að reynt hafi á ákvæðið og því veitir rökstuðningur kærunefndarinnar fágæta leiðbeiningu um mat á slíkum kringumstæðum. Ber a.m.k. annar úrskurðanna það með sér að sjálf mistökin þurfi ekki í öllum tilvikum að vera neytanda ljós þegar hann tekur ákvörðun um kaup, leggur inn pöntun og greiðir kaupverð heldur geta viðbrögð verslunarinnar þegar hún áttar sig á að mistök hafi orðið haft mikið að segja. Þann lærdóm má einnig draga af úrskurðunum að verslanir verði að gæta þess sérstaklega að söluverð sé ávallt rétt merkt.
Réttur neytenda til að fá vöru afhenta gegn greiðslu merkts söluverðs er verulega ríkur og þarf mikið til að koma svo verslanir geti komist undan slíkri afhendingu. Úrskurðirnir hafa ekki verið birtir á vefsíðu kærunefndarinnar en von er á að svo verði innan tíðar.
