18/08/2026 | Stjórnvöld, Umsagnir, Úr hagsmunagæslunni
SVÞ fagna áformum stjórnvalda um markvissari aðgerðir gegn skipulagðri brotastarfsemi og taka undir markmið um skilvirkari afbrotavarnir, rannsóknir og saksókn. Samtökin leggja jafnframt til breytingu sem styrki stöðu fyrirtækja og annarra einkaréttarlegra aðila sem eiga kröfur vegna brota.
Í umsögninni benda SVÞ á að skilyrði fyrir því að hafa uppi einkaréttarkröfur í sakamálum séu ströng og að hætta geti skapast á að kröfuhafar missi réttar síns ef þeir eða fyrirsvarsmenn þeirra geta ekki mætt fyrir dóm. Samtökin telja því rétt að ákæranda verði með skýrum hætti gert skylt að taka við umboði og fylgja slíkum kröfum eftir fyrir hönd kröfuhafa.
Að mati SVÞ myndi slík breyting draga úr samfélagslegu tjóni, styrkja réttarstöðu þolenda og minnka þann kostnað sem getur fallið á fyrirtæki við að gæta hagsmuna sinna í sakamálum.
Sjá nánari hér –> 18082026 Umsögn SVÞ Áform um aðgerðir gegn skipulagðri brotastarfsemi
18/08/2026 | Stjórnvöld, Umsagnir, Úr hagsmunagæslunni
SVÞ taka undir áherslur hvítbókar um byggðamál um mikilvægi öflugs atvinnulífs, traustra innviða og góðs aðgengis að þjónustu. Samtökin leggja sérstaklega áherslu á að samgöngur, vöruflutningar, rekstrarskilyrði verslunar og aðgengi að sérfræðiþjónustu verði hluti af heildstæðri byggðastefnu.
SVÞ benda á að áreiðanlegar vegasamgöngur og góð vetrarþjónusta séu grundvallarforsenda þjónustu og verðmætasköpunar á landsbyggðinni. Þá telja samtökin mikilvægt að tekjur sem innheimtar eru vegna notkunar ökutækja skili sér með skýrari hætti til viðhalds, þjónustu og uppbyggingar vegakerfisins.
Í umsögninni er jafnframt fjallað um rekstrarskilyrði dagvöruverslana í minni byggðarlögum. SVÞ telja að stuðningsúrræði þurfi að útfæra í nánu samráði við hagaðila og án þess að raska samkeppni. Samtökin hvetja einnig til þess að skoðað verði hvort heimila megi áfengissölu í slíkum verslunum, að ákveðnum skilyrðum uppfylltum, til að styrkja tekjugrundvöll þeirra.
SVÞ fagna einnig áherslu á betra aðgengi að sérhæfðri heilbrigðisþjónustu á landsbyggðinni og telja mikilvægt að nýta bæði opinbera og einkarekna þjónustuveitendur, þar á meðal stað- og fjarþjónustu.
Sjá nánar hér –> 20060818 Umsögn um hvítbók um byggðamál
17/08/2026 | Stjórnvöld, Umsagnir, Úr hagsmunagæslunni
SVÞ vara við því að innleiðing kolefnisgjalds við landamæri (CBAM) geti haft veruleg áhrif á innkaupsverð og kostnað íslenskra fyrirtækja. Samtökin leggja áherslu á vandaða innleiðingu, að komið verði í veg fyrir gullhúðun og að stjórnvöld greini bæði bein og afleidd áhrif kerfisins á atvinnulífið.
SVÞ áætla að verðmæti innflutnings til Íslands árið 2025 í þeim vöruflokkum sem falla undir CBAM hafi verið um 60 milljarðar króna. Þar vega járn og stál þyngst, með um 36 milljarða króna innflutningsverðmæti, en einnig falla meðal annars ál og álvörur, áburður og sement undir kerfið. Samtökin benda á að CBAM geti bæði hækkað kostnað við innflutning frá ríkjum utan EES og haft áhrif til hækkunar á verði sambærilegra vara innan EES.
SVÞ kalla jafnframt eftir greiningu á tengslum CBAM við aðra íslenska löggjöf, meðal annars tollalög og lög um úrvinnslugjald. Mikilvægt sé að stjórnvöld geri grein fyrir beinum og óbeinum áhrifum innleiðingarinnar áður en henni er lokið, ekki síst þar sem gert er ráð fyrir að gildissvið CBAM geti síðar orðið víðtækara.
Sjá nánar hér –> 17.08.26Umsögn um drög að frumvarpi um Aðlögunarkerfi við landamæri vegna kolefnis (CBAM)
14/08/2026 | Fréttir, Greining, Í fjölmiðlum, Stjórnvöld, Verslun
Allt að 100 þúsund Íslendingar hafa keypt áfengi af öðrum smásölum en ÁTVR. Nýleg könnun Gallup sýnir að um þriðji hver landsmaður hefur verslað áfengi í vefverslun og hlutfallið nálgast 60% meðal fólks á aldrinum 20–39 ára.
Þetta kemur fram í frétt Vísis um samstarfsherferð SVÞ og sérvöruverslana með áfengi. Markmið herferðarinnar er að draga fram þá staðreynd að neytendur hafa þegar valið aukið valfrelsi — á meðan löggjöfin hefur ekki fylgt þróun markaðarins.
Núverandi reglur heimila erlendum fyrirtækjum að selja áfengi til Íslands í gegnum vefverslun en gera ekki ráð fyrir sambærilegum möguleika fyrir íslensk fyrirtæki. Með skýrari lagaramma væri hægt að jafna samkeppnisstöðu fyrirtækja og tryggja um leið fullnægjandi eftirlit með aldri kaupenda, opnunartíma, aðgengi og markaðssetningu.
Á sama tíma og vefverslun og sérvöruverslanir hafa rutt sér til rúms hefur áfengisneysla hér á landi minnkað um tæp 11% frá árinu 2021.
„Þjóðin hefur alltaf tekið skrefin á undan löggjafanum þegar kemur að áfengislöggjöf,“ segir Benedikt S. Benediktsson, framkvæmdastjóri SVÞ. Veruleikinn sé sá að fólk vilji val og ekki sé raunhæft að ætla að snúa þróuninni við.
Nánari upplýsingar og staðreyndir um vefverslun með áfengi má finna á
14/08/2026 | Stjórnvöld, Umsagnir, Úr hagsmunagæslunni
SVÞ og Samtök atvinnulífsins (SA) telja að Samkeppniseftirlitið dragi of sterkar ályktanir um verðmyndun og samkeppni á eldsneytismarkaði áður en fullnægjandi gögn liggja fyrir. Samtökin vara jafnframt við íþyngjandi inngripum á borð við hámarksverð eða hámarksálagningu án ítarlegrar greiningar á rekstrarskilyrðum markaðarins.
Í umsögninni er bent á að verð og álagning á eldsneyti verði ekki metin án þess að horft sé til kostnaðar og áhættu sem fylgir innkaupum, flutningum, birgðahaldi, gengissveiflum og fjármögnun. Þá sé íslenski markaðurinn smár og uppbygging hans frábrugðin mörgum erlendum samanburðarmörkuðum. Alþjóðlegur verðsamanburður geti því gefið villandi mynd ef ekki er tekið tillit til þessara þátta.
Samtökin gera einnig athugasemdir við lagalegar forsendur umræðuskjalsins og telja mikilvægt að skýr greinarmunur sé gerður á sérstöku eftirliti með tímabundinni lækkun virðisaukaskatts og almennu eftirliti samkvæmt samkeppnislögum. Áður en gripið verði til frekari aðgerða þurfi að liggja fyrir heildstæð greining á verðmyndun, kostnaði, samkeppnisaðstæðum og áhrifum yfirstandandi orkuskipta á eldsneytismarkaðinn.
Sjá nánar hér —> Umsögn um umræðuskjal SKE um eldsneytismarkaðinn
12/08/2026 | Fréttir, Í fjölmiðlum, Stjórnvöld, Umhverfismál
Ný umbúðareglugerð Evrópusambandsins, PPWR, getur haft veruleg áhrif á íslenska verslun, veitingarekstur og framleiðslu. Benedikt S. Benediktsson, framkvæmdastjóri SVÞ, ræddi áhrif hennar í viðtali við Vísi í gær 11. ágúst 2026 [SJÁ FRÉTT]
Reglugerðinni er ætlað að draga úr umbúðaúrgangi og notkun einnota umbúða. Markmiðin eru jákvæð. Íslensk verslun hefur ekki hag af því að selja vörur í óþarflega miklum umbúðum eða umbúðum sem eru erfiðar í úrvinnslu. Hvorki verslunin né neytendur hafa þó hag af því að vöruverð hækki í ljósi hækkandi umbúðakostnaðar. Þá virðist innleiðing PPWR að ýmsu leyti geta framkallað umfangsmiklar og kostnaðarsamar breytingar án þess að ásættanlegur umhverfisárangur hljótist af.
Benedikt bendir á að íslenskar aðstæður séu aðrar en víða í Evrópu og mikilvægt sé að taka mið af því við innleiðinguna:
„Enda má gera ráð fyrir að meginhluti regluverksins hafi verið svona hannaður með hliðsjón af þörfum og ástandi í Mið- og Suður-Evrópu, sem kannski á ekki við hér, og í ýmsu tilliti erum við komin bara lengra en þau ríki sem þar eru.“
Reglurnar geta einnig haft áhrif á veitingarekstur og kallað á aukna notkun endurnýjanlegra umbúða. Benedikt segir ýmis álitaefni fylgja slíkum breytingum, meðal annars varðandi matvælaöryggi:
„Þar eru uppi fjölmörg álitamál sem snúa að bara svona heilnæmi matvælanna þegar þau eru bara ekki geymd í umbúðum eða í einhverjum stöðluðum umbúðum sem hafa sannað gildi sitt.“
Stjórnvöld þurfa að upplýsa um næstu skref
SVÞ hafa kallað eftir því að íslenskra hagsmuna verði gætt í aðdraganda þess að PPWR verður tekin upp í EES-samninginn. Telja samtökin að sambærileg sjónarmið hafi komið fram af hálfu annarra EFTA-ríkja. Skilningur SVÞ er að umhverfis-, orku- og loftslagsráðherra hafi góðan skilning á stöðunni og á vettvangi ráðuneytis hans verði hagsmunagæslan virk.
