30/04/2019 | Fréttir
Næstkomandi haust hefst í Verzlunarskóla Íslands ný stafræn viðskiptalína á framhaldsskólastigi. Línan er svar við örum breytingum á vinnumarkaðinum og þá sérstaklega í starfsumhverfi verslunar og þjónustu. Námslínan brýtur blað í sögu Verzlunarskólans þar sem vinnustaðanám í stafrænni verslun og þjónustu er hluti af náminu. Þannig tengir námið nemendur við atvinnulífið með beinum hætti og gefur þeim innsýn í þau störf og þá hröðu þróun sem á sér stað innan verslunar og þjónustu.
Miklar framfarir og vöxtur stafrænnar tækni kallar á auknar kröfur um menntun á því sviði. Um leið verður slík menntun nauðsynleg fyrir atvinnugreinar sem vaxa ógnarhratt hvort heldur sem er í formi vefverslana eða annarra stafrænna þjónustulausna. Séreinkenni námslínunnar er annars vegar falin í nýjum áföngum er tengjast stafrænum lausnum, greiningu á gögnum og notagildi samfélagsmiðla í markaðssetningu og hins vegar vinnustaðanámi. Með vinnustaðarnáminu fá nemendur innsýn og þjálfun í þeim nýju störfum sem skapast hafa og munu halda áfram að skapast innan verslunar og þjónustu í kjölfar þeirrar hröðu starfrænu þróunar sem á sér stað.
Einungis 25 nemendur verða teknir inn í námið í haust en um 40 verðandi nemendur við Verzlunarskólann sóttu um. Námslínan er samvinnuverkefni Samtaka verslunar og þjónustu, Verzlunarskóla Íslands, VR og Starfsmenntasjóðs verslunar og skrifstofufólks. Unnið hefur verið að undirbúningi námsins sl. tvö ár að frumkvæði Samtaka verslunar og þjónustu.
15/04/2019 | Fréttir, Í fjölmiðlum
Jón Ólafur Halldórsson, formaður SVÞ, ræddi fasteignaskattana við þá Gulla og Heimi Í bítinu á Bylgjunni á mánudegi í Dymbilviku. Útreikningur gjaldanna er flókinn og ógagnsær og þeir eru íþyngjandi fyrir fyrirtæki og einstaklinga.
>> Smelltu hér til að fara á vef Bylgjunnar til að hlusta á viðtalið.
11/04/2019 | Fréttir, Í fjölmiðlum
Jón Ólafur Halldórsson segir fasteignagjöld, eins og þau eru nú, fráleit og ekki hægt að bjóða atvinnulífinu upp á þau. Fyrirkomulagið sé galið. Fyrirkomulagið sé með allt öðrum hætti á hinum Norðurlöndunum, þar sem menn séu með varúðarfærslur sem ekki séu til staðar hér. Auk þess séu boðaðar lækkanir borgarinnar allt of langt undan.
Jón Ólafur ræðir einnig breytingar í verslun, bæði í miðborg Reykjavíkur en einnig almennt.
Hlusta má á viðtalið við Jón Ólaf hér (hefst á ca. 9:50).
09/04/2019 | Fréttir, Viðburðir
Fullt var út úr dyrum á fyrilestri um þær áskoranir sem stjórnendur standa frammi fyrir við þróun og innleiðingu stafrænna lausna og áhri þeirra á menningu fyrirtækja. Helga Jóhanna Oddsdóttir frá Strategic Leadership og Tómas Ingason frá Icelandair fóru yfir mikið af gagnlegum atriðum fyrir stjórnendur og líflegar umræður sköpuðust á fundinum.
Félagar í SVÞ geta séð upptöku af fundinum á lokuðum Facebook hóp fyrir SVÞ félaga, en þangað var honum streymt beint í morgun. Athugið að sækja þarf um inngöngu og svara nokkrum spurningum svo að sannreyna megi að viðkomandi starfi hjá félagi sem aðili er að samtökunum.
Við erum alls ekki hætt því við tökum upp þráðinn eftir páska og eru starfsmenn okkar í óða önn að ganga frá þeirri dagskrá svo hefja megi kynningarstarf. Við hvetjum ykkur því til að fylgjast með hér á vefnum, vera skráð á póstlistann og fylgjast með á Facebook, Twittter og LinkedIn svo þið missið ekki af neinu!
09/04/2019 | Fréttir
Settur hefur verið upp lokaður Facebook hópur fyrir félagsmenn SVÞ. Tilgangurinn er að hafa lokað svæði þar sem hægt er að deila ýmsu efni með félagsmönnum. Nú þegar geta félagsmenn nálgast þar upptöku af erindi Greg Willams, aðalritstjóra WIRED frá opnu ráðstefnunni okkar, Keyrum framtíðina í gang! í mars sl. og streymi frá fundi um stafræna vegferð, með Helgu Jóhönnu Oddsdóttur frá Strategic Leadership og Tómasi Ingasyni, framkvæmdastjóra stafrænnar þróunar og upplýsingatækni hjá Icelandair.
Við hvetjum félagsmenn til að sækja um aðgang að hópnum hér: https://www.facebook.com/groups/samtok.vth/
Vinsamlegast athugið að til að fá aðgang þarf að svara spurningum sem upp koma þegar sótt er um, svo að við getum sannreynt að viðkomandi starfi hjá fyrirtæki sem er aðili að samtökunum.
Við hlökkum til að deila með ykkur frekara gagnlegu efni innan hópsins í framtíðinni!
27/03/2019 | Fréttir, Samtök heilbrigðisfyrirtækja
Á aðalfundi Samtaka heilbrigðisfyrirtækja, sem haldinn var fyrir skömmu, var kosinn nýr formaður. Jón Gauti Jónsson, framkvæmdastjóri Domus Medica er nýr formaður samtakanna og tekur hann við af Stefáni Einari Matthíassyni, sem verið hefur formaður allt frá stofnun, eða s.l. tíu ár. Við óskum Jóni Gaut til hamingju með formennskuna.
