24/11/2025 | Fréttir, Í fjölmiðlum, Stjórnvöld
Breytingar á vörugjaldi nýrra ökutækja, sem taka gildi um áramót, munu leiða til verulegrar hækkunar á meðal fólksbílum og geta aukið verðbólgu. Þetta kom fram í viðtali við Benedikt S. Benediktsson, framkvæmdastjóra SVÞ, í fréttum RÚV í gær, 23. nóvember.
Meðalbíll hækkar um 20%
Vörugjald á rafmagnsbíla verður fellt niður, en hækkað á bílum sem ganga að hluta eða öllu leyti fyrir jarðefnaeldsneyti. Benedikt bendir á að hækkunin bitni mest á meðalbílum á miðlungsverði, þar sem tengiltvinnbílar eru vinsælir.
„Meðalbíllinn mun, að meðaltali, hækka norðan við 20%,“ segir Benedikt.
Hins vegar muni eyðslumeiri bensín- og dísilbílar „taka litla sem enga hækkun“.
Innflytjendur bíla og bílaleigur fá skamman aðlögunartíma
Innflytjendur hafa flestir þegar gert innkaupaáætlanir fyrir 2026 og eiga erfitt með að bregðast við breytingunum. Bílaleigur verði þó fyrir mestum áhrifum, þar sem lítil eftirspurn sé eftir rafbílum hjá þeirra viðskiptavinum.
Tekjuforsendur ríkisins taldar óraunhæfar
Stjórnvöld gera ráð fyrir að breytingin skili 7,5 milljörðum króna í auknum tekjum.
Benedikt varar við að hegðun kaupenda geti raskað forsendunum:
„Sumir munu flýta kaupum fram yfir áramót. Við höfum áhyggjur af því að tekjuforsendurnar séu veikar.“
Hækkun bíla smitast út í verðlag
Verðhækkun á bílum sem áfram þurfa jarðefnaeldsneyti muni óhjákvæmilega hafa áhrif á verðlag.
„Þeir sem kaupa þessa bíla taka á sig verulegar hækkanir – og það smitar út í vöru- og þjónustuverð,“ segir Benedikt.
SVÞ: Innleiða þarf breytingarnar af varfærni
SVÞ ítrekar að breytingar sem þessar verði að byggja á:
- raunhæfum tekjuforsendum,
- og eðlilegum aðlögunartíma.
Samtökin hvetja stjórnvöld til að endurskoða innleiðinguna og tryggja að orkuskipti náist án óhóflegra áhrifa á heimili og fyrirtæki.
Smelltu hér fyrir frétt frá RÚV.is
21/11/2025 | Fréttir, Greining, Í fjölmiðlum, Verslun
Í viðtali á Bylgjunni í gær 20. nóvember fór Benedikt S. Benediktsson, framkvæmdastjóri SVÞ, yfir niðurstöður árlegrar könnunar Rannsóknaseturs verslunarinnar um Jólagjöf ársins 2025 – og ef einhver hélt að árið myndi kalla á “glitrandi glingur”, þá er svarið einfalt: nei, neytandinn vill nytsamlegt og raunhæft.
„Fólk er sífellt meðvitaðra. Gjöfin þarf að nýtast – ekki bara skreyta,“ sagði Benedikt í þættinum, og benti á að fyrirtæki og verslanir séu orðnar mun markvissari í að auglýsa gjafir sem bæta lífið, einfalda tilveruna eða endast lengur en jólatréið sjálft.
Nýju gögnin frá RSV sýna að Íslendingar vilja helst fá hlýjar flíkur, útivistarfatnað, gagnleg heimilistæki, góð bók, snjallúr, heyrnartól, gjafabréf – og já, AirFryer-inn er enn að reyna að slá í gegn, þó hann sé ekki toppurinn lengur.
Gjafabréf, upplifanir og bækur halda einnig velli, en stóra breytingin í ár er sú að neytendur leggja meiri áherslu á gæði og gagnsemi en áður. Gjöfin á að „skilja eitthvað eftir sig“, helst eitthvað sem bætir heilsu eða líðan – eða einfaldlega gerir daginn aðeins betri.
Jólagjöfin 2025 er ekki eitt tiltekið hlutverk – heldur hugmyndafræði. Hún er praktísk, varanleg og lifir með þiggjandanum inn í nýtt ár.
Smelltu hér fyrir frétt frá Rannsóknarsetri verslunarinnar.
Smelltu hér til að hlusta á viðtalið á Bylgjunni.
12/11/2025 | Fréttir, Í fjölmiðlum, Umhverfismál, Verslun
„Kostnaðaráhrifin verða töluverð,“ segir Benedikt S. Benediktsson, framkvæmdastjóri SVÞ í viðtali við Viðskiptablaðið 11.11.25. Reglugerðin PPWR mun kalla á verulegar breytingar í virðiskeðju vara.
Ný reglugerð Evrópusambandsins um umbúðir og umbúðaúrgang (PPWR – Packaging and Packaging Waste Regulation) mun hafa víðtæk áhrif á íslenskan markað þegar hún verður innleidd hér á landi. Reglugerðin, sem öðlaðist gildi í ESB í febrúar 2025, hefur það markmið að draga úr magni umbúða og umbúðaúrgangs, auka endurvinnslu og styðja við hringrásarhagkerfið.
Benedikt S. Benediktsson, framkvæmdastjóri Samtaka verslunar og þjónustu, segir að regluverkið muni hafa áhrif á nær öll fyrirtæki í virðiskeðju vara.
„Áhrifin geta orðið margþætt, allt frá einskiptiskostnaði vegna breytinga á framleiðslu eða sölusvæði og uppbyggingu svæða til móttöku á endurnýjanlegum umbúðum til langtímakostnaðar vegna nýrra gerða umbúða,“ segir Benedikt.
Hann bendir á að reglugerðin muni krefjast mikils undirbúnings og að „heilt yfir má gera ráð fyrir að kostnaðaráhrif vegna PPWR verði töluverð.“
Guðrún Aðalsteinsdóttir, framkvæmdastjóri Krónunnar, tekur í sama streng og vakti athygli í grein sinni í Viðskiptablaðinu fyrir stuttu að „í grunninn sé um jákvæða þróun að ræða“ en útfærslan verði að taka mið af íslenskum aðstæðum.
„Við erum lítið land í dreifðri byggð, háð innflutningi og með takmarkaða möguleika vegna smæðar markaðarins til að hafa áhrif á hönnun og framleiðslu umbúða erlendis,“ segir Guðrún. Hún leggur áherslu á „samræmda og raunhæfa innleiðingu“ og telur mikilvægt að stjórnvöld nálgist verkefnið í nánu samstarfi við atvinnulífið.
Samtök verslunar og þjónustu hafa ásamt systursamtökum á Norðurlöndum þegar lagt fram tillögur um aðlögun að regluverkinu og vinna að því að tryggja að innleiðingin verði í takt við séríslenskar aðstæður.
Lestu allt viðtalið og umfjöllunina inn á Viðskiptablaðinu HÉR!
___________________
ATH!
SVÞ, SI & Deloitte halda sérstakan kynningafund fyrir félagsfólk um innleiðingu PPWR þann 20. nóvember nk –
SMELLTU HÉR til að skrá þig.
11/11/2025 | Fréttir, Stjórnvöld, Umhverfismál
Ný reglugerð Nr. 1144/2025 frá 5. nóvember 2025 um plastvörur hefur tekið gildi.
SVÞ – Samtök verslunar og þjónustu vekja sérstaka athygli á að við setningu reglugerðarinnar gætti umhverfis-, orku- og loftslagsráðherra, Jóhann Páll Jóhannsson, íslenskra hagsmuna.
Í stað þess að gerð yrði sú stífa krafa að ýmsar vörur sem innihalda plast, á borð við dömubindi, beri forprentaðar merkingar á íslensku ákvað ráðherra að merkingar innfluttra vara megi bera upprunalegan texta á dönsku, norsku, sænsku eða ensku.
„Þetta er mjög jákvætt og óhætt að hrósa ráðherra fyrir framtakið. Við fögnum því að ráðherra hafi valið að fara þessa leið enda ljóst að ESB fór fram úr sér við setningu merkingarkrafna. Við berum virðingu fyrir viðhorfum þeirra sem leggja áherslu á íslenskt mál en teljum að fórnarkostnaðurinn vegna kröfunnar um íslenskar merkingar hefði orðið mikill og ósanngjarn og slík niðurstaða hefði ekki verið neinum til framdráttar.“ segir Benedikt S. Benediktsson, framkvæmdastjóri SVÞ.
Í reglugerðinni er gert ráð fyrir að tilteknar einnota plastvörur – eins og blautþurrkur, drykkjarglös og tóbakssíur – eigi að vera merktar á íslensku nema í tilviki innfluttra vara, þær megi verka merktar á dönsku, norsku, sænsku eða ensku. Það þýðir að ekki þarf að útbúa séríslenskar vörur ef fyrirliggjandi vörur uppfylla þegar merkingarkröfur í nágrannalöndunum. Fyrir vikið minnka líkur á verðhækkunum verulega og ekki verður þörf á að taka af markaði vörur þeirra framleiðenda sem ekki uppfylla merkingakröfur.
SVÞ telur þetta gott dæmi um þegar stjórnvöld og atvinnulíf ganga í takt.
10/11/2025 | Fréttir, Greinar, Í fjölmiðlum, Stjórnvöld
Fjármála- og efnahagsráðuneytið hefur óskað eftir því að efnahags- og viðskiptanefnd Alþingis leggi til hækkun vörugjalda af ökutækjum sem ætlað er að auka vörugjaldstekjur um hátt í 67% milli ára.
Benedikt S. Benediktsson, framkvæmdastjóri SVÞ og Bílgreinasambandsins (BGS), fjallar í grein á Vísi í dag, ‘Pops áttu p?‘ um áhrif þessara breytinga.
Hvað gerist að öllu óbreyttu?
Fallist efnahags- og viðskiptanefnd á beiðni ráðuneytisins getur eftirfarandi gerst, um næstu áramót:
- Verð á meðalrafmagnsbíl hækkar um 66 þúsund krónur.
- Verð á meðaltengiltvinnbíl sem brennir bensíni eða dísilolíu og er líka hægt að stinga í samband við raftengil hækkar um 815 þúsund krónur.
- Verð á meðalbensínbíl hækkar um 847 þúsund krónur.
- Verð á meðaltvinnbíl sem gengur fyrir bensíni eða dísilolíu og er með rafhlöðu sem er ekki hægt að stinga í samband við raftengil hækkar um rúmlega eina milljón króna.
- Verð á meðaldísilbíl hækkar um tæplega 1,5 milljónir króna.
- Meðalkassabíll sem gengur fyrir dísilolíu og er væntanlega einkum notaður til að dreifa vörum innanbæjar hækkar um tæpar 2,8 milljónir króna.
En þetta er vitaskuld einungis leiðrétting!
SMELLTU HÉR til að lesa greinina inn á VISI.
07/11/2025 | Fréttir, Í fjölmiðlum, Verslun
Benedikt S. Benediktsson, framkvæmdastjóri SVÞ – Samtaka verslunar og þjónustu var gestur í Bítinu á Bylgjunni í morgun, 7. nóvember 2025.
Sagði Benedikt þar m.a. að þrátt fyrir verðhækkanir og aukinn rekstrarkostnað finni verslunarmenn ekki fyrir verulegum samdrætti. „Íslenski neytandinn er allavega ekki að sýna merki um samdrátt enn sem komið er,“ segir Benedikt.
Hann bendir á að hegðun neytenda sé þó að breytast – til dæmis með því að innkaup séu frestuð til mánaðamóta og fólk annað hvort kaupi ódýrari útgáfur innan sama vöruflokks eða nýti afsláttartímabil betur. „Það skiptist í tvennt, það er tilfærsla yfir á ódýrari hluta vara í sama vöruflokki. Það er þróun sem er búin að eiga sér stað síðustu tvö ár,“ segir Benedikt.
Jólaverslunin er hafin og fyrstu merki benda til að hún fari betur af stað en margir áttu von á. „Fyrstu merki eru allavega ekki að neytendur séu að halda að sér höndum,“ segir Benedikt.
LESTU ALLA FRÉTTINA INN Á VISI HÉR
