01/02/2021 | Fréttir, Innra starf
Óskað er eftir framboði til formanns SVÞ, fjögurra meðstjórnenda í stjórn SVÞ og fulltrúa SVÞ í fulltrúaráð Samtaka atvinnulífsins.
Taktu þátt í að móta framtíðina í kjölfar heimsfaraldurs…
Heimsfaraldur COVID-19 hefur nú haft gríðarleg áhrif á starfsemi fyrirtækja í tæpt ár. Hvað tekur við að faraldrinum afstöðnum? Hver verða langtímaáhrifin? Munu viðskiptahegðun og neyslumynstur fólks verða gerbreytt?
Faraldurinn mun með einum eða öðrum hætti hafa afgerandi áhrif á starfsumhverfi fyrirtækja næstu ár og um ókomna framtíð. Helstu sérfræðingar eru sammála um að lykillinn að endurreisn efnahagskerfa heimsins liggi í stafrænni umbreytingu. Hvað getum við gert til að styðja fyrirtækin okkar á þessum róstursömu tímum? Hvernig getum við stutt fyrirtækin okkar á stafrænni vegferð?
Stjórn SVÞ hefur vakandi auga með breytingum sem verða á viðskiptaumhverfi fyrirtækja í verslun og þjónustu. Með setu í stjórn samtakanna gefst þér tækifæri til að hafa áhrif á áherslur SVÞ. Þín þátttaka getur skipt sköpum.
Ertu ekki alveg kjörin/n?
Kjörnefnd SVÞ leitar að áhugasömum stjórnendum til setu í stjórn samtakanna. Kjörgengir eru stjórnendur og stjórnarmenn í aðildarfyrirtækjum samtakanna.
Formaður SVÞ er kjörinn til tveggja ára.
Þrír stjórnarmenn taka sæti til næstu tveggja starfsára og einn til eins árs.
Þá er leitað eftir fulltrúum til setu í fulltrúaráði SA til eins árs.
Við hvetjum þig til að bjóða þig fram eða senda inn tilnefningu fyrir kl. 12:00 hinn 18. febrúar nk. en framboðsfrestur samkvæmt samþykktum rennur út 25. febrúar. Aðalfundur verður haldinn 18. mars nk.
Í stjórn SVÞ eiga sæti formaður og sex meðstjórnendur.
Eftirtaldir meðstjórnendur eiga sæti í stjórninni til loka næsta starfsárs, 2021/2022:
- Gunnar Egill Sigurðsson, Samkaup hf.
- Kjartan Örn Sigurðsson, Verslanagreining ehf.
Þrír meðstjórnendur skulu kosnir til setu í stjórn SVÞ fyrir næstu tvö starfsár. Einn meðstjórnandi mun ganga úr stjórninni á næsta aðalfundi og í hans stað þarf að kjósa nýjan meðstjórnanda til eins árs.
Tilnefningar til formanns SVÞ, stjórnar samtakanna og fulltrúaráðs SA skulu sendar til SVÞ – Samtök verslunar og þjónustu, Borgartúni 35, 105 Reykjavík, merktar „Kjörnefnd SVÞ“ eða á netfangið: kosning@svth.is. Það nægir að senda upplýsingar um nafn, starf og fyrirtæki ásamt tilnefningu, eða yfirlýsingu um framboð. Haft verður samband við frambjóðendur í kjölfarið varðandi fyrirkomulag framboðsins og kosninganna að öðru leyti.
Rétt er að minna á að tillögur um breytingar á samþykktum SVÞ þurfa að berast stjórn samtakanna eigi síðar en 18. febrúar 2021.
Konur, jafnt sem karlar, eru hvattar til að gefa kost á sér í stjórn SVÞ og í fulltrúaráð SA.
Kjörnefnd SVÞ
27/01/2021 | Fréttatilkynningar, Fréttir, Innra starf
Bílgreinasambandið og SVÞ – Samtök verslunar og þjónustu hefja í dag öflugt samstarf með undirritun samstarfsyfirlýsingar. Markmiðið er að efla þjónustu við félagsmenn í samskiptum við stjórnvöld, í lögfræðilegum álitamálum og í fræðslu- og menntunarmálum ásamt því að styrkja rekstur beggja samtaka.
Flóknara rekstrarumhverfi fyrirtækja kallar á samvinnu
Rekstrarumhverfi fyrirtækja í bílgreininni og í verslun og þjónustu verður sífellt flóknara með auknum kröfum af margvíslegu tagi sem m.a. leiða til aukinna samskipta við stjórnsýsluna. Samvinna eflir þessi samskipti, eykur þjónustu og upplýsingagjöf og er til mikillar hagræðingar fyrir félagsmenn. Hún er ekki síður hagræðing fyrir stjórnsýsluna sem þarf þá að taka við færri umsögnum sem oftar en ekki eru efnislega sambærilegar. Sífellt hraðari tækniþróun kallar á aukna fræðslu og menntun sem samtökin geta eflt enn frekar með samvinnu.
Miklar væntingar til samstarfsins
„Það eru klárlega samlegðaráhrif á fjölmörgum sviðum sem gerir samtökunum kleift að vinna enn betur fyrir félagsmenn sína. Samskipti við stjórnsýsluna verða markvissari og öflugri, félagsmenn Bílgreinasambandsins munu njóta góðs af aðgengi að fræðsludagskrá SVÞ, enda er eðli bílgreinarinnar í raun verslun og þjónusta, og hagræðing í rekstrarkostnaði samtakanna er augljós. Við væntum mikils af þessu samstarfi,” segir María Jóna Magnúsdóttir, framkvæmdastjóri Bílgreinasambandsins.
Stefnt að enn frekara samstarfi
Andrés Magnússon, framkvæmdastjóri SVÞ, fagnar samstarfinu, enda ljóst að með því verði samtökin enn sterkara hagsmunaafl fyrir félagsmenn sína. „Hagsmunir þessara greina fara að langmestu leyti saman og í ljósi þess fögnum við þessum samstarfi og vonumst til að geta þróað það áfram enn frekar.”
17/12/2020 | COVID19, Fréttir, Í fjölmiðlum, Lyfsöluhópur, Stjórnvöld
Fyrirsögnin á forsíðu Viðskiptablaðsins þann 17. desember er Reglugerð ógni lyfjaöryggi og á blaðsíðu 10 og 11 er viðtal við Andrés Magnússon, framkvæmdastjóra SVÞ og Jakob Fal Garðarsson, framkvæmdastjóra Frumtaka – samtaka framleiðenda frumlyfja.
Í viðtalinu kemur m.a. fram að fyrirhuguð reglugerð muni hafa verulega neikvæð áhrif á lyfjageirann hérlendis m.a. með því að hafa letjandi áhrif á skráningu nýrra lyfja og geti jafnvel leitt til afskráningar lyfja sem nú eru á markaði og í mikilli notkun.
29/10/2020 | COVID19, Fréttir, Samtök heilbrigðisfyrirtækja, Stjórnvöld
Samtök heilbrigðisfyrirtækja telja að landlækni hafi skort lagastoð fyrir að fresta valkvæðum skurðaðgerðum. Samtökin hafa sent heilbrigðisráðneytinu erindi og gert grein fyrir þeirri afstöðu. Virðist sem landlæknir hafa grundvallað fyrirmæli sín á lagaákvæði sem veitir slíkri frestun ekki stoð. Undir slíkum kringumstæðum verður að líta svo á að engin fyrirmæli hafi verið gefin út varðandi frestunina.
28/10/2020 | Fréttir, Í fjölmiðlum, Stafræn viðskipti, Stafræna umbreytingin
Þóranna K. Jónsdóttir, markaðs- og kynningarstjóri SVÞ og jafnframt verkefnastjóri í þeim verkefnum sem snúa að stafrænni þróun, var í viðtali í Morgunútvarpi Rásar 2 þriðjudaginn 27. október.
Í viðtalinu ræddi hún stöðu Íslands í stafrænni þróun og sameiginlega hvatningu og tillögur SVÞ og VR til stjórnvalda um stefnumótun og aðgerðir í stafrænum málum. Sjá meira um það hér.
Þóranna sagði Ísland standa aftarlega í nýtingu stafrænnar tækni m.a. í atvinnulífinu og menntakerfinu, og ræddi einkum skort á stafrænni hæfni almennt, hvort sem er meðal stjórnenda, starfsfólks eða almennings. Hún sagði jafnframt nauðsynlegt að bregðast við með markvissum aðgerðum til að tryggja samkeppnishæfni Ísland og að halda uppi þeim lífsgæðum, velmegun og atvinnustigi sem við erum almennt vön hérlendis og viljum halda í.
28/10/2020 | Fréttir, Samtök sjálfstæðra skóla
Samningur á milli Samtaka sjálfstætt starfandi skóla og Eflingar stéttarfélags var undirritaður föstudaginn 23. október síðastliðinn.
Samtökin fagna samningnum sem tryggir sömu kjör og gilda um starfsmenn Eflingar í því sveitarfélagi sem starfað er í. Tryggt er í samningnum að samið verði fyrst við sveitarfélög áður en gengið er til samninga við Samtök sjálfstæðra skóla sem var forsenda Samtakanna fyrir samningi, enda framlög til sjálfstæðra skóla byggð á rekstrarkostnaði í þeim sveitarfélagi sem starfa er í.
