10/04/2025 | Fréttir, Í fjölmiðlum, Stjórnvöld, Verslun, Þjónusta
Samtök verslunar og þjónustu fylgjast grannt með þróun í alþjóðaviðskiptum, sérstaklega í ljósi nýrra tolla sem Bandaríkin hafa innleitt á fjölbreyttan vöruinnflutning. Í viðtali við Morgunblaðið í dag segir Benedikt S. Benediktsson, framkvæmdastjóri SVÞ, að áhrifin séu enn óljós hér á landi – en mikilvægt sé að vera viðbúinn.
„Enn sem komið er er ekki unnt að koma auga á bein áhrif tollahækkana og verðlag á neytendamarkaði á Íslandi,“ segir Benedikt.
Bandaríkin hafa beitt 10% viðbótartollum á fjölbreyttan innflutning vegna ágreinings um viðskiptahætti. Ísland hefur ekki gripið til hefndaraðgerða, en fylgst er með hvort áhrif gætu birst í verðlagi á íslenskum markaði.
„Á íslenskum neytendamarkaði eru ýmsar bandarískar vörur á boðstólum á borð við sætar kartöflur, morgunkorn, ávexti, sósur, rúsínur, brauð, gosdrykki, safa, baunir og kornmeti, grænmeti, hveiti, fæðubótarefni, hjólbarða, matarolíur og margt fleira. Við sjáum ekki að verðlagning þessara vara ætti að breytast beinlínis vegna tolla, a.m.k. enn sem komið er,“ segir Benedikt.
Hann bendir á að svigrúm til að meta langtímaáhrif tollanna sé enn af skornum skammti, en að það sé brýnt að hafa auga með þróuninni: „Ef svo óheppilega myndi fara að Ísland yrði fyrir barðinu á breiðvirkum hefndartollum annara ríkja, sem myndu þá væntanlega helgast af einhvers konar einangrunarstefnu, gætu áhrifin orðið allt önnur, beinni og miklu meiri. Á þessum tímapunkti virðist það þó heldur ólíkleg sviðsmynd,“ segir Benedikt.
SVÞ tekur undir mikilvægi þess að greina möguleg áhrif tolla á aðfangakeðjur íslenskra fyrirtækja, sérstaklega þar sem vörur framleiddar eða seldar undir bandarískum vörumerkjum kunna að verða fyrir verðbreytingum.
04/04/2025 | Fréttir, Verslun, Þjónusta
Donald Trump, forseti Bandaríkjanna, tilkynnt um innleiðingu 10% lágmarkstolls á allar innfluttar vörur til Bandaríkjanna, þar á meðal íslenskar vörur. Þessar aðgerðir munu hafa víðtæk áhrif á íslenskan útflutning og verslunar- og þjónustufyrirtæki sem treysta á bandaríska markaðinn.
Tollarnir taka gildi í tveimur áföngum:
- 5. apríl 2025: 10% lágmarkstollur á allar innfluttar vörur.
- 9. apríl 2025: Gagntollar sem fela í sér 20% toll á vörur frá Evrópusambandinu
Þó að Ísland falli í lægsta tollflokkinn, mun þessi þróun hafa neikvæð áhrif á samkeppnisstöðu íslenskra fyrirtækja á bandarískum markaði. Evrópusambandið hefur lýst yfir samningsvilja en boðað sterk viðbrögð ef ekki næst samkomulag við Bandaríkin.
Sjá nánari frétt og samantekt frá SA hér!
SVÞ – Samtök verslunar og þjónustu hvetja íslensk stjórnvöld til að tryggja hagstæð skilyrði fyrir íslenskt atvinnulíf í ljósi þessara breytinga. Við munum fylgjast náið með þróun mála og veita aðildarfyrirtækjum okkar uppfærðar upplýsingar og leiðbeiningar eftir því sem málin skýrast.
04/04/2025 | Fréttir, Innra starf, Samtök sjálfstæðra skóla
Aðalfundur Sjálfstæðra skóla fór fram 3. apríl síðastliðinn. Að fundi loknum héldu samtökin upp á tímamót – 20 ár liðin frá stofnun samtakanna. Í tilefni dagsins var litið um öxl og farið yfir vegferðina fram að deginum í dag.
Margrét Pála Ólafsdóttir, Margrét Theódórsdóttir og Lovísa Hallgrímsdóttir, sem skipuðu fyrstu stjórn Sjálfstæðra skóla, rifjuðu upp upphafsárin og sögðu frá þeirri hugsjón og eldmóði sem lagði grunn að starfi samtakanna.
Villi Naglbítur lét gleðina ráða för með söng og gamanmálum sem vöktu hlátur og góðar undirtektir. Þá heilsaði Steinn Jóhannsson, nýr sviðsstjóri Skóla- og frístundasviðs Reykjavíkurborgar, gestum og færði samtökunum velfarnaðaróskir.
Að lokinni dagskrá nutu félagsmenn samverunnar yfir góðum veitingum, veigum og ánægjulegum samræðum.
31/03/2025 | Fréttir, Ræktum vitið, Verslun, Þjónusta
Samstarfsverkefni SVÞ, VR og LÍV er á góðri siglingu eftir formlega opnun á verkefninu Ræktum vitið.
Markmiðin eru skýr: að gera sí- og endurmenntun að eðlilegum og sjálfsögðum hluta af starfsumhverfi í verslunar- og þjónustugreinum.
Til að halda áfram á þessari braut og tryggja árangur – komum við til með að kanna árlega stöðuna hjá aðildarfélögum okkar og nú stendur einmitt yfir árleg könnun Maskínu og við hvetjum stjórnendur hjá aðildarfyrirtækjum SVÞ sérstaklega til þátttöku.
✔ Það tekur aðeins örfáar mínútur að svara
✔ Þín skoðun skiptir máli
✔ Með þátttöku leggur þú þitt af mörkum til áframhaldandi uppbyggingar
Líkt og áður eru tvær kannanir í gangi:
🔹 Ein fyrir starfsfólk innan VR
🔹 Og ein fyrir stjórnendur innan SVÞ
Við ætlum að ná þeim metnaðarfullu markmiðum sem sett voru í samstarfssamningnum – en við gerum það ekki án ykkar.
Maskína hefur nú sent út könnunartengil með tölvupósti – framlag þitt skiptir máli.
![UPPBROT: Fólk – Tækni – Samkeppni [Upptökur]](https://svth.is/wp-content/uploads/2025/03/Screenshot-2025-03-20-at-07.58.36.png)
20/03/2025 | Fræðsla, Fréttir, Innra starf, Innri, Stafræna umbreytingin, Upptaka, Útgáfa, Verslun, Þjónusta
Ráðstefna SVÞ 2025 UPPBROT: Fólk - Tækni - Samkeppni .pdf
17/03/2025 | Fréttir, Viðburðir
Hvernig er hægt að efla samkeppni og auka skilvirkni?
Um þetta verður rætt á fundi á Hilton Reykjavik Nordica, Suðurlandsbraut 2, fimmtudaginn 27. mars.
Fundurinn er á vegum Háskólans í Reykjavík, í samstarfi við SA, SVÞ, SAF, SAMORKU, SFF, SFS, SI, og Viðskiptaráð.
Hanna Katrín Friðriksson atvinnuvegaráðherra flytur opnunarávarp.
Framsögufólk verða:
- Antoine Winckler
Yfirráðgjafi hjá Cleary Gottlieb Steen & Hamilton
EU merger control, a procedural analysis: what works and what doesn‘t?
- Katie Curry
Hagfræðingur / meðeigandi hjá RBB Economics
Merger control and international competitiveness: conflicting priorities?
- Heimir Örn Herbertsson
Sérfræðingur í samkeppnisrétti við Háskólann í Reykjavík og hæstaréttarlögmaður
Merger control enforcement in Iceland – the eye of the needle?
Að erindum loknum verða pallborðsumræður framsögumanna ásamt Páli Gunnari Pálssyni, forstjóra Samkeppniseftirlitsins. Fundarstjórn og stjórn pallborðsumræðna verður í höndum Ásu S. Hallsdóttur, yfirlögfræðings samkeppnismála hjá Volvo í Svíþjóð.
Húsið opnar kl. 8:30 þar sem boðið verður upp á morgunmat fyrir alla fundargesti.
Dagskráin hefst svo stundvíslega kl. 9 og lýkur kl. 12.
Fyrir nánari upplýsingar og skráningu, smelltu hér!
