01/04/2022 | Fréttatilkynningar, Fréttir
Samtök verslunar og þjónustu sendir í dag eftirfarandi fréttatilkynningu til fjölmiðla:
Í upphafi árs 2021 ákváðu stjórnir Bílgreinasambandsins og SVÞ að hefja náið samstarf á hagsmunasviðinu með undirritun samstarfsyfirlýsingar. Markmiðið er að efla þjónustu við félagsmenn í samskiptum við stjórnvöld, í lögfræðilegum álitamálum og fræðslu- og menntunarmálum ásamt því að styrkja rekstur beggja samtaka.
Umbreyting í rekstrarumhverfi fyrirtækja kallar á samvinnu
Kveikjan að þessu nána samstarfi var sú að rekstrarumhverfi fyrirtækja í bílgreinum, í verslun og í þjónustu almennt verður sífellt flóknara, með auknum kröfum af margvíslegu tagi sem m.a. leiða til aukinna samskipta við stjórnsýsluna. Samvinna eflir þessi samskipti, eykur þjónustu og upplýsingagjöf og er til mikillar hagræðingar fyrir félagsmenn. Hún er ekki síður hagræðing fyrir stjórnsýsluna sem þarf þá að taka við færri umsögnum sem oftar en ekki eru efnislega sambærilegar. Sífellt hraðari tækniþróun kallar á aukna fræðslu og menntun sem samtökin geta eflt enn frekar með samvinnu.
Í ljósi reynslunnar af góðu samstarfi milli SVÞ og BGS ákváðu stjórnir samtakanna að tillaga um sameiningu yrði lögð fyrir aðalfundi samtakanna. Niðurstaða auka aðalfundar BGS (Bílgreinasambandsins) þann 17. febrúar s.l.var einróma samþykki sameiningar við SVÞ. Á aðalfundi SVÞ sem fór fram 17.mars s.l. var endahnúturinn hnýttur með einróma samþykki stjórnar SVÞ. Sameiningin tekur formlega gildi frá og með deginum í dag, 1.apríl 2022.
„Við sjáum fram á áframhaldandi samlegðarávinning á fjölmörgum sviðum. Samskipti við stjórnsýsluna verða markvissari og öflugri, og að félagsmenn Bílgreinasambandsins munu njóta áfram góðs af aðgengi að fræðsludagskrá SVÞ. Við erum spennt fyrir áframhaldinu og væntum mikils af þessu samstarfi,” segir Jóhannes Jóhannesson, staðgengill framkvæmdastjóra Bílgreinasambandsins við tækifærið.
Jón Ólafur Halldórsson formaður SVÞ, fagnar staðfestingu á sameiningunni, enda ljóst að með því að BGS sameinist Samtökum verslunar og þjónustu verði samtökin enn sterkara hagsmunaafl fyrir félagsmenn sína. „Í ljósi mikilla breytinga í fyrirtækjarekstri og nýjum áskorunum á tímum fjórðu iðnbyltingarinnar fögnum við þessari sameiningu og hlökkum til að byggja enn frekar upp tengsl og ávinning fyrir alla hagsmunaaðila“
Halldór Benjamín Þorbergsson, framkvæmdastjóri SA fagnar þessum tímamótum. „Með sameiningu BGS og SVÞ fá félagsmenn Bílgreinasambandsins aðgang að öflugri þjónustu SVÞ og SA um leið og samtökin sjálf fá liðsstyrk öflugra nýrra félagsmanna. Við fögnum þessari sameiningu og teljum hana til heilla fyrir alla aðila og ánægjulegt að yfir 100 fyrirtæki innan bílgreinar bætist í sterkan hóp fyrirtækja innan vébanda Samtaka atvinnulífsins.“
____________________________
Nánari upplýsingar veita:
Andrés Magnússon, framkvæmdastjóri SVÞ
Sími: 820 4500
Jóhannes Jóhannesson, staðgengill framkvæmdastjóra Bílgreinasambandsins
Sími: 568 1550
Fréttatilkynning Sameining SVÞ og BGS 2022
17/03/2022 | Fréttatilkynningar, Fréttir
Ný stjórn SVÞ kjörin á aðalfundi samtakanna
Aðalfundur SVÞ – Samtaka verslunar og þjónustu var haldinn í morgun í Hyl, Húsi atvinnulífsins. Á fundinum var kosið um þrjú sæti meðstjórnenda og einn til eins árs. Alls bárust fimm framboð.
Réttkjörin í stjórn SVÞ til næstu tveggja ára eru: Gunnar Egill Sigurðsson, framkvæmdastjóri Samkaupa, Edda Rut Björnsdóttir, framkvæmdastjóri Mannauðs-og samskiptasviðis Eimskips og Brynjúlfur Guðmundsson, framkvæmdastjóri Artasan ehf.
Réttkjörinn í stjórn SVÞ til eins árs er; Óskar Sigurðsson, viðskipafræðingur, löggildur verðbréfamiðlari Accountant ehf.
Fulltrúi Bílgreinasambandsins í stjórn SVÞ næsta starfsár verður Egill Jóhannsson, forstjóri Brimborgar
Formaður SVÞ, Jón Ólafur Halldórsson, forstjóri Marga var á síðasta ári endurkjörinn til 2023.
Stjórn er því skipuð eftirfarandi aðilum starfsárið 2022-2023:
- Jón Ólafur Halldórsson, forstjóri Marga, formaður SVÞ
- Guðrún Jóhannesdóttir, framkvæmdastjóri Kokku
- Hinrik Örn Bjarnason, framkvæmdastjóri N1
- Gunnar Egill Sigurðsson, framkvæmdastjóri Samkaupa
- Edda Rut Björnsdóttir, framkvæmdastjóri Mannauðs og samskiptasviðs Eimskips
- Brynjúlfur Guðmundsson, framkvæmdastjóri Artasan ehf og
- Óskar Sigurðsson, viðskiptafræðingur, löggildur verðbréfamiðlari Accountant ehf.
- Egill Jóhannsson, forstjóri Brimborgar
„Verkefnin framundan eru fjölbreytt og krefjandi, um leið og við þökkum fráfarandi stjórn fyrir sín störf bjóðum nýtt stjórnarfólk velkomið til starfa og hlökkum til að eiga með þeim farsælt samstarf á nýju starfsári.“
Nánari upplýsingar veitir:
Andrés Magnússon, framkvæmdastjóri SVÞ
Sími: 820 4500
________________
SMELLIÐ HÉR TIL AÐ NÁLGAST ÁRSSKÝRSLU STJÓRNAR 2021-2022
28/01/2022 | Fréttatilkynningar, Fréttir
Ný reglugerð heilbrigðisráðherra tekur gildi á miðnætti og felur í sér eftirtaldar breytingar:
- Almennar fjöldatakmarkanir fari úr 10 í 50 manns.
- Nándarregla fari úr 2 metrum í 1 metra.
- Óbreytt grímuskylda, sem tekur þó almennt mið af nándarreglu.
- Sund-, baðstaðir, líkamsræktarstöðvar og skíðasvæði verði heimilt að hafa opið með 75% afköstum.
- Íþróttakeppnir verði áfram heimilar með 50 þátttakendum og áhorfendur séu leyfðir á ný.
- Hámarksfjöldi í verslunum geti mest orðið 500 manns.
- Skemmtistöðum, krám, spilastöðum og spilakössum verði heimilað að opna á ný.
- Veitingastöðum, þ.m.t. krám og skemmtistöðum, verði heimilt að hleypa nýjum viðskiptavinum til kl. 23.00 en gestum verði gert að yfirgefa staðina kl. 00.00.
- Á sitjandi viðburðum verði heimilt að taka á móti allt að 500 gestum í hverju hólfi, viðhalda skuli 1 metra nándarreglu milli óskyldra aðila auk grímuskyldu. Ekki verði þörf á hraðprófum.
- Í skólum verði óbreyttar takmarkanir, þó þannig að þær verði aðlagaðar framangreindum tilslökunum eftir því sem við á.
- Reglugerðin gildi í tæpar fjórar vikur til og með 24. febrúar.
Í tilkynningu frá Stjórnarráðinu segir að ráðherra hafi vikið lítillega frá tillögum sóttvarnalæknis, þ.e. með því að láta nýju reglurnar taka gildi fyrr, lengja opnunartíma veitingastaða um tvær klukkustundir í stað einnar og hækka hámarksfjölda í verslunum.
18/01/2022 | Fréttatilkynningar, Fréttir, Verslun, Þjónusta
FRÉTTATILKYNNING
Hvatning SVÞ til leiðtoga og stjórnenda fyrirtækja
Framsýni, innsæi og hugrekki eru eiginleikar sem stjórnendur fyrirtækja og stofnana þurfa á að halda þegar viðhorfsumbreytingar verða í samfélaginu. Samtök verslunar og þjónustu hvetja alla leiðtoga til að taka samtalið og festa niður aðgerðaáætlun svo þeim verði ávallt fært að endurtengja gildi, samfélagslega ábyrgð og traust.
Samfélagsleg stefna fyrirtækja verður á hverjum tíma að stuðla að fjölbreyttri flóru mannauðsins og jafnrétti kynjanna.
„Við lifum á miklum umbreytingatímum. Á slíkum tímum skapast tækifæri til að horfa innávið og skoða fyrir hvað við stöndum og hvernig látum við gildin okkar endurspeglast bæði í orði og athöfnum? Fyrsta skrefið til breytinga er að taka samtalið. Því vill SVÞ hvetja leiðtoga til aðgerða sem stuðla að nærandi fyrirtækjamenningu fyrir alla.“ Segir Andrés Magnússon framkvæmdastjóri SVÞ.
SVÞ býður fulltrúum aðildarfyrirtækja sinna upp á fræðslu og hvatningu næstu vikurnar undir myllumerkinu #TökumSamtalið.
Hinn 26.janúar nk. mun Guðrún Högnadóttir, framkvæmdastjóri Franklin Covey á Íslandi halda fyrirlesturinn „Trúverðuleiki og traust á markaði“ þar sem varpað verður ljósi á rannsóknir og rit um traust til einstaklinga og vinnustaða og stýrir um leið samtali um virði trausts.
SKRÁNING HÉR
Hinn 2. febrúar nk. mun Rúna Magnúsdóttir, leiðtogamarkþjálfi og meðstofnandi No More Boxes vitundarvakningarinnar, standa fyrir sérsniðnum viðburði þar sem þátttakendur skoða hvernig birtingarmyndir á staðalímyndum kynjanna eru ómeðvitað að stjórna aðgerðum okkar og framgangi. Skoðum hvað er til ráða og veltum upp spurningunni: Hversvegna er alveg hægt að kenna gömlum hundum að sitja?
SKRÁNING HÉR
_____
Nánari upplýsingar veitir:
Andrés Magnússon, framkvæmdastjóri SVÞ
Sími: 820 4500
14/01/2022 | Fréttatilkynningar, Fréttir, Stjórnvöld
Á MIÐNÆTTI TAKA GILDI HERTAR REGLUR UM SAMKOMUTAKMARKANIR
- Í verslunum verður heimilt að taka á móti 50 manns í rými og til viðbótar fimm viðskiptavinum fyrir hverja 10 m 2 umfram 100 m 2 .
- Þó mega verslanir að hámarki taka á móti 200 viðskiptavinum í rými.
- Áfram skal leitast við að viðhafa 2 metra nálægðartakmörkun þar sem fólk staldrarvið í lengri tíma, svo sem í biðröðum á kassasvæðum.
- Áfram er óskoruð grímuskylda í verslunum og verslunarmiðstöðvum.
Að öðru leyti skal á öllum vinnustöðum, s.s. á skrifstofum, og í allri starfsemi tryggja að ekki séu á sama tíma fleiri en 10 einstaklingar inni í sama rými.
_________________________
Fyrir stundu var birt tilkynning á vef heilbrigðisráðuneytisins með fyrirsögnina COVID-19: Almennar samkomutakmarkanir hertar á miðnætti. Í tilkynningunni segir m.a.:
Hámarksfjöldi í verslunum fari úr 500 í 200 manns.
Í tilkynningunni er að finna drög að nýrri reglugerð um takmörkum á samkomum vegna farsóttar. Gengið er út frá því að hún verði birt í dag í Stjórnartíðindum og taki gildi á miðnætti.
Af lestri reglugerðardraganna verður ráðið að þær meginreglur muni gilda að fjöldasamkomur, þar sem 10 einstaklingar eða fleiri koma saman, séu óheimilar og tryggja skuli að hægt sé að hafa a.m.k. 2 metra milli einstaklinga sem ekki eru í nánum tengslum.
Í tilviki verslana er vikið frá meginreglunum að tvennu leyti:
- Verslunum verður heimilt að taka við 50 manns í rými og til viðbótar 5 viðskiptavinum í viðbót fyrir hverja 10 m2 umfram 100 m2.
Sú meginbreyting verður hins vegar að í stað þess að hámarksfjöldi viðskiptavina í rými nemi 500 viðskiptavinum mun hann nema 200 viðskiptavinum.
Svo dæmi sé tekið verður unnt að taka á móti 50 viðskiptavinum í 90 m2 rými, 55 viðskiptavinum í 110 m2 rými, 100 viðskiptavinum í 200 m2 rými, 150 viðskiptavinum í 300 m2 rými og 200 viðskiptavinum í 400 m2 rými eða stærra.
- Óskoruð grímuskylda mun gilda í verslunum og verslunarmiðstöðvum.
SJÁ NÁNAR TILKYNNINGU FRÁ STJÓRNARRÁÐI ÍSLANDS
06/01/2022 | Fréttatilkynningar, Fréttir, Stafræna umbreytingin
Félagsmenn SVÞ munu í dag fá senda könnun í tölvupósti um stafræna hæfni sem unnin er fyrir Stafræna Hæfniklasann í samstarfi við SVÞ.
Könnunin er byggð á spurningum þróuðum af Center for Digital Dannelse og byggja á DigComp módeli um stafræna hæfni sem er á vegum Evrópusambandsins.
Meginmarkmið könnunarinnar er að leggja mat á almenna stafræna hæfni stjórnenda og á hvaða sviðum er þörf á aukinni hæfni til að efla stafræna hæfni fyrirtækja og stjórnenda í verslun og þjónustu.
Þessi könnun er hluti af stærra verkefni þar sem megin markmið er að efla íslensk fyrirtæki, stjórnendur og starfsfólk í stafrænni hæfni og tryggja það að við séum meðal þeirra fremstu í heimi í nýtingu stafrænnar tækni til að tryggja samkeppnishæfni og lífsgæði.
Prósent sér um framkvæmd könnunar og fer eftir ströngum siðareglum ESOMAR sem settar eru af alþjóðasamtökum markaðsrannsóknarfyrirtækja þar sem sérstaklega er unnið eftir lögum um persónuvernd og meðferð persónuupplýsinga.
Einn heppinn þátttakandi hlýtur 30.000 kr. bankagjafakort.
