Vinnustofur í mótun, utanumhaldi og innleiðingu umhverfisstefnu
Í framhaldi af morgunfyrirlestri um mótun umhverfisstefnu bjóða SVÞ og BravoEarth upp á fríar vinnustofur fyrir fyrirtæki innan SVÞ til að aðstoða þau við að móta, halda utan um og innleiða umhverfisstefnu. Vinnustofurnar eru liður í vöruþróun BravoEarth.
ATH! SVÞ félagar geta séð upptöku frá fyrirlestrinum hér inni á lokaða Facebook hópnum okkar. Ekki er nauðsynlegt þó að hafa horft á fyrirlesturinn til að nýta sér vinnustofurnar.
Fyrirtæki um allan heim eru að móta og innleiða umhverfisstefnu með það að markmiði að minnka sóun, nýta auðlindir betur og axla þannig ábyrgð fyrir framtíðina. Umhverfisstefna snertir alla starfsemi fyrirtækisins og er því mikil áskorun fólgin bæði í mótun og innleiðingu, þ.e. að framfylgja stefnunni. Mikilvægt er að virkja starfsmenn til að geta samstillt aðgerðir og fá starfsmenn til að breyta hegðun.
Ávinningur við innleiðingu á umhverfisstefnu er m.a.:
Betri afkoma: Minni sóun og betri nýting á auðlindum skilar sér í betri rekstrarniðurstöðum fyrir utan mikilvægi þess að vinna gegn loftslagsbreytingum.
Aukið stolt og starfsánægja: Það veldur mörgu starfsfólki vanlíðan að horfa upp á sóun á sínum vinnustað. Minni sóun og aukin umhverfisvernd skila sér í stoltara og ánægðara starfsfólki.
Bætt ímynd: Fólk beinir í auknum mæli viðskiptum sínum til þeirra sem standa sig vel í umhverfismálum. Árangursrík innleiðing er því gríðarlega mikilvæg fyrir verslun og þjónustu.
Dagskrá:
Kynning: Af hverju umhverfisstefna? Farið yfir stefnumótunar ferlið.
Umhverfisstefna: Farið verður yfir uppbyggingu umhverfisstefnu og hvað þarf að vera til staðar í henni. Greindir verða innri og ytri hagsmunaaðilar.
Hópastarf: Skilgreindir verða þættir sem vinna þarf með, s.s. endurvinnsla, heitt vatn, rafmagn, umbúðir o.s.frv. Verkefni í hverjum flokki skilgreind og hannaðir matsrammar til að meta framkvæmd.
Innleiðing: Breytingastjórnun. Hvernig komum við umhverfisstefnu í framkvæmd?
Afrakstur vinnustofunnar:
- Tilbúinn grunnur að umhverfisstefnu fyrir þína tegund af starfsemi.
- Skilgreindir verða helstu flokka sem vinna þarf með (s.s. endurvinnslu, orku, samgöngur o.s.frv.).
- Grunnur að verkefnum og matsrömmum sem fyrirtækið getur nýtt við innleiðingu.
Haldnar verða vinnustofur sem hugsaðar eru fyrir mismunandi starfsemi:
Þriðjudaginn 14. janúar kl. 9-12: Skrifstofustarfsemi
Unnið verður að umhverfisstefnu fyrir fyrirtæki með starfsemi sem rúmast getur innan skilgreiningar skrifstofustarfsemi. Þetta getur átt við velflest fyrirtæki þar sem skrifstofustarfsemi er oftast hluti af starfseminni. Mögulegt er að sækja fleiri en eina vinnustofu eftir eðli starfsemi fyrirtækisins. T.d. geta verslunarfyrirtæki sótt bæði þessa vinnustofu til að móta umhverfisstefnu fyrir skrifstofuhluta starfseminnar og næstu vinnustofu sem ætluð er verslun þar sem farið er yfir aðra hluti sem snúa sérstaklega að verslunarhluta starfseminnar.
SKRÁNING HÉR
Fimmtudaginn 16. janúar kl. 9-12: Verslun
Unnið verður að umhverfisstefnu fyrir fyrirtæki sem rúmast getur innan skilgreiningar verslunarstarfsemi, hvort sem um er að ræða heildverslun, sérverslun, matvöruverslun, netverslun eða annarskonar verslunarstarfsemi. Einnig geta fyrirtæki í verslun sem eru með sérstaka skrifstofustarfsemi sótt fyrri vinnustofu til að móta umhverfisstefnu fyrir skrifstofuhluta starfseminnar.
SKRÁNING HÉR
Leiðbeinendur:
Vilborg Einarsdóttir
Vilborg Einarsdóttir er stofnandi og framkvæmdastjóri BravoEarth ehf. Vilborg með MSc gráðu í Stjórnun og stefnumótun frá Háskóla Íslands og Verslunarháskólanum í Árósum. Vilborg er meðstofnandi og fyrrum framkvæmdastjóri Mentors ehf. Hún hefur yfirgripsmikla reynslu bæði úr menntageiranum og úr atvinnulífinu. Sat t.d. í stjórn Íslandsstofu, Tækniþróunarsjóðs, Samtaka iðnaðarins og í Samráðsvettvangi um aukna hagsæld. Vilborg var stundakennari við Viðskiptafræðideild Háskóla Íslands í stjórnun og stefnumótun auk þess að hafa haldið fjölda fyrirlestra bæði hérlendis og erlendis varðandi menntun, nýsköpun og að byggja upp alþjóðlegt þekkingafyrirtæki.
Kjartan Sigurðsson
Kjartan Sigurðsson er kennari og verkefnastjóri við Háskólann í Reykjavík. Kjartan hefur umsjón með framkvæmd og innleiðingu á PRME (Principles for Responsible Management Education) í HR, en PRME er frumkvæði Sameinuðu þjóðanna um alþjóðlegt samstarf viðskiptaháskóla til að efla menntun á svið samfélagslegrar ábyrgðar, sjálfbærni og viðskiptasiðferðis. Kjartan er með MSc gráðu í Alþjóðaviðskiptum frá Háskólanum í Reykjavík og BA gráðu í Félagsfræði frá Háskóla Íslands og mun ljúka doktorsnámi frá HR árið 2020. Kjartan hefur víðtæka reynslu sem framkvæmdastjóri og frumkvöðull og hefur einnig starfað víða í Evrópu og á Íslandi við ráðgjöf á innleiðingu og framkvæmd áætlanagerða í fyrirtækjum á sviði samfélagslegrar ábyrgðar, sjálfbærni og nýsköpunar. Kjartan hefur víðtæka reynslu á sviði rannsókna á samfélagslegri ábyrgð fyrirtækja, en rannsóknir hans fela meðal annars í sér skoða hvort að fyrirtæki hafi hagsmuni af því að innleiða og móta stefnu fyrirtækja um samfélagslega ábyrgð og sjálfbærni.
Um BravoEarth
BravoEarth er íslenskt nýsköpunarfyrirtæki með hugbúnaðarlausn sem ætlað er að auðvelda litlum og meðalstórum fyrirtækjum að móta og innleiða umhverfisstefnu í starfsemi sinni.
Óskað eftir tilnefningum til Menntaverðlauna
Upptaka af fyrirlestri um vellíðan á vinnustað
SVÞ og Fransk-íslenska viðskiptaráðið héldu í síðustu viku hádegisfyrirlestur með innanhússstílistanum Caroline Chéron hjá Bonjour. Fyrirlesturinn var vel sóttur og í honum fjallaði Caroline um ýmislegt varðandi hönnun vinnurýmist til að hafa áhrif á vellíðan starfsfólks og viðskiptavina. Hún fór m.a. yfir uppröðun í rýmum, liti, form og fleira gagnlegt og áhugavert.
Caroline vinnur bæði fyrir heimili og fyrirtæki og hefur unnið með fjölda fyrirtækja að því að bæta vinnurými til að auka vellíðan starfsmanna og viðskiptavina.
Þú getur séð myndir frá fyrirlestrinum hér á Facebook síðu Fransk-íslenska viðskiptaráðsins og upptöku frá fyrirlestrinum hér fyrir neðan.
Fræðslufundur MAST: Breyttar reglur um innflutning á hráu kjöti
Matvælastofnun heldur fræðslufund um breyttar reglur um innflutning á hráu kjöti til Íslands fimmtudaginn 28. nóvember kl. 13:00 – 15:00 í húsnæði stofnunarinnar að Dalshrauni 1b í Hafnarfirði.
Markmið fundar er að upplýsa um þær reglur sem brátt taka gildi um innflutning á fersku hráu kjöti til Íslands og þær kröfur sem innflytjendur og dreifingaraðilar þurfa að uppfylla. Farið verður yfir viðbótartryggingar vegna salmonellu og sérreglur um kampýlóbakter.
Dagskrá:
- Breyttar reglur um innflutning á fersku hráu kjöti til Íslands
- Staðan á Íslandi og í Evrópu
- Kampýlóbakter í alifuglakjöti – ábyrgð matvælafyrirtækja
- Salmonella í eggjum og kjöti – ábyrgð matvælafyrirtækja
- Eftirlit og viðurlög
Fundurinn er ætlaður matvælafyrirtækjum, einkum þeim sem flytja inn og dreifa hráum dýraafurðum, og öðrum áhugasömum.
Tilefni fundar er afnám frystikröfu og leyfisveitingar á innfluttum hráum dýraafurðum í kjölfar EFTA dóms.
Atvinnuvega- og nýsköpunarráðuneytið hefur unnið að sérreglum um kampýlóbakter í alifuglakjöti og öflun viðbótartrygginga vegna salmonellu í samstarfi við Matvælastofnun. Í upphafi ársins samþykkti Eftirlitsstofnun EFTA (ESA) heimild Íslands til að beita reglum um viðbótartryggingar vegna salmonellu í innfluttu kjúklinga- og kalkúnakjöti og eggjum. Viðbótartrygging vegna salmonellu í innfluttu svína- og nautakjöti var samþykkt á fundi sameiginlegu EES nefndarinnar 25. október sl.
Fræðslufundurinn er opinn öllum og þátttakendum að kostnaðarlausu. Honum verður streymt í gegnum Neytendavakt Matvælastofnunar á Facebook og upptaka gerð aðgengileg þar og á vef Matvælastofnunar að fundi loknum.
Frábær fundur um sjálfbærni
Mikil ánægja var með félagsfund sem haldinn var miðvikudaginn 13. nóvember sl. um sjálfbærni. Á fundinum héldu erindi þær Eva Magnúsdóttir, ráðgjafi og eigandi Podium og Viktoría Valdimarsdóttir, ráðgjafi og eigandi Ábyrgra lausna. Að auki fengum við innsýn í þá sjálfbærnivinnu sem í gangi er hjá þremur aðildarfyrirtækjum SVÞ, með erindum frá Ásdísi Björg Jónsdóttur, deildarstjóra samfélagsábyrgðar og gæðamála hjá Festi, Sigurði Pálssyni, forstjóra Byko og Málfríði Guðný Kolbeinsdóttur, sérfræðings í umbótastjórnun hjá Ölgerðinni.
Eva veitti m.a. innsýn í viðhorf aldamótakynslóðarinnar, en fólk af þeirri kynslóð leggur mikla áherslu á að skipta við ábyrg fyrirtæki. Einnig fór hún yfir rannsóknir sem sýndu mikilvægi jákvæðrar samfélagslegrar ímyndar og áhrif hennar á á viðhorf neytenda til fyrirtækja. Mikill meirihluti neytenda vilja skipta við ábyrg fyrirtæki og stór hluti þeirra myndi hætta viðskiptum við fyrirtæki verði þau uppvís að óábyrgum viðskiptaháttum. Eva fjallaði jafnframt um áhrif samfélagslegrar ábyrgðar fyrirtækja á fjárhagslegt gengi þeirra, sölu og framtíðarhorfur og tók dæmi frá heimsþekktum fyrirtækjum á borð við Rolex, Lego og Unilever þar sem samfélagsleg ábyrgð hefur verið höfð í hávegum. Eva sýndi mjög áhugaverðar tölur um fjárhagslegan ávinning af umhverfisumbótum innlendra sem erlendra fyrirtækja.
Viktoría fjallaði um breytingar í rekstrarumhverfi fyrirtækja og upplýsingagjöf. Hún fór yfir innleiðingu á tilskipun Evrópusambandsins (ESB 2014/95) um ófjárhagslega þætti þar sem ákveðnum fyrirtækjum er gert skylt að greina frá viðskiptalíkani og lykilmælikvöðrum er lúta að umhverfi og samfélagi samhlið fjárhagslegum upplýsingum. Hún fór yfir hina ýmsu alþjóða staðla og viðmið sem notuð eru þegar kemur að þessum málum og lagði áherslu á traustar upplýsingar sem byggðar eru á gagnsæju umhverfis- og samfélagsbókhaldi . Einnig lagði hún áherslu á að fyrirtæki skoði öll markmið Sameinuðu þjóðanna, heimsmarkmiðin, framkvæmi mikilvægisgreiningu við val á áherslumarkmiðum, forðist svokallaða kirsuberjatínslu (e. cherry picking) og greini frá jákvæðum og neikvæðum áhrifum en ekki einungis frá markmiðum sem líta vel út í skýrslu. Hún fjallaði um orðsporsáhættu og samfélagslegt rekstrarleyfi (e. social licence to oporate) sem horfið getur á einni nóttu starfi fyrirtæki ekki heiðarlega. Að lokum lagði hún áherslu á ávinning af innleiðingu við sjálfbærniskýrslugerð með traustum upplýsingum, sem getur m.a. falist í markaðsforskoti, virðisauk og lámörkun áhættu.
Það var einnig mjög áhugavert að fá innsýn í sjálfbærnivinnu Festi, Byko og Ölgerðarinnar. Fyrir áhugsama má kynna sér það sem þessi fyrirtæki eru að gera í sjálfbærni og samfélagslegri ábyrgð á vefsíðum þeirra:
N1: https://www.n1.is/um-n1/samfelagsleg-abyrgd/
Byko: https://www.byko.is/umhverfismal
Ölgerðin: http://www.olgerdin.is/um-olgerdina/samfelagsabyrgd
Á myndinni f.v.: Málfríður Guðný Kolbeinsdóttir frá Ögerðinni, Sigurður Pálsson frá Byko, Ásdís Björg Jónsdóttirfrá Festi, Viktoría Valdimarsdóttir frá Ábyrgum lausnum, Eva Magnúsdóttir frá Podium, og Fanney Karlsdóttir, fundarstjóri og skrifstofustjóri Umhverfisverðlauna Norðurlandaráðs.